ନୋଏଡା, ୨୧।୦୯ : ମାଆ ଓ ଝିଅଙ୍କ ଉପରେ ମାଡିଗଲା କାର । ଜୀବନ ହାରିଲେ ଉଭୟ । ଏପରି ଅଭାବନୀୟ ଘଟଣା ଘଟିଛି ନୋଏଢା ସେକ୍ଟର ୩୭ ଅଞ୍ଚଳରେ । ମହିଳାଙ୍କ ସ୍ୱାମୀ ମଧ୍ୟ ଦୁର୍ଘଟଣାରେ ଆହତ ହୋଇଥିବା ଜଣାପଡିଛି ।
ସୂଚନା ଅନୁସାରେ, ଆଗ୍ରାର ରାମକରଣ ଶର୍ମା ପରିବାର ସହ ସଲାରପୁର ଜଏସଜେ ଆପାର୍ଟମେଣ୍ଟରେ ରୁହନ୍ତି । ସେ ପତ୍ନୀ ନୀରଜ ଶର୍ମା ଓ ଝିଅ ଅଞ୍ଚଳିଙ୍କ ସହ ମଥୁରା ଯାଇଥିଲେ । ସେଠାରୁ ଫେରି ସେକ୍ଟର ୩୭ ଅଞ୍ଚଳରେ ରାସ୍ତା କଡରେ ବସ୍ ଷ୍ଟପରେ ଅଟୋ ରିକ୍ସାକୁ ଅପେକ୍ଷା କରିଥିଲେ । ହଠାତ ଶଶିଚୌକ ତରଫରୁ ଏକ ସ୍କର୍ପିଓ ସେମାନଙ୍କ ଉପରେ ଚଢି ଯାଇଥିଲା । ଘଟଣାସ୍ଥଳରେ ୩ ଜଣ ଗୁରୁତର ହୋଇଥିଲେ ।
ଖବର ପାଇ ପୋଲିସ ଘଟଣାସ୍ଥଳରେ ପହଁଚି ସେମାନଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲା । ତେବେ ନୀରଜ ଓ ଅଞ୍ଜଳି ପ୍ରାଣ ହରାଇଥିଲେ । ଏବେ ରାମକରଣଙ୍କ ଚିକିତ୍ସା ଜାରି ରହିଛି ।
ପୋଲିସର କହିବାନୁସାରେ, ଦୁର୍ଘଟଣା ପରେ ସ୍କର୍ପିଓଟି ଫେରାର ହୋଇଯାଇଛି । ସେଠାରେ ଉପସ୍ଥିତ କିଛି ଲୋକ ସ୍କର୍ପିଓର ନମ୍ବର ମନେ ରଖିଥିଲେ । ଗାଡିଟି ଗିଝୋଡର ଜଣେ ବ୍ୟକ୍ତିଙ୍କ ନାଁରେ ରହିଛି । ଗାଡି କିଏ ଚଲାଉଥିଲା ସେନେଇ ତଦନ୍ତ ଜାରି ରହିଛି ବୋଲି ପୋଲିସ କହିଛି ।
