ଜଳେଶ୍ବର ୪।୧: ଆଜି ବି ମଣିଷ ମନରେ ରହିଛି ଅନ୍ଧବିଶ୍ବାସ ଏବଂ କୁସଂସ୍କାର । ଅନ୍ଧବିଶ୍ବାସର ବଶବର୍ତ୍ତୀ ହୋଇ ଲୋକେ ଏତେ ତଳକୁ ଖସି ଯାଉଛନ୍ତି ଯେ ମଣିଷ ମାରିବାକୁ ମଧ୍ୟ ପଛାଉନାହାନ୍ତି । ପ୍ରାୟତଃ ଆଦିବାସୀ ଅଧ୍ୟୁଷିତ ଉପାନ୍ତ ଅଞ୍ଚଳମାନଙ୍କରେ ଏଭଳି ଘଟଣା ଦେଖିବାକୁ ମିଳିଥାଏ । ଏଭଳି ଏକ ଅଭାବନୀୟ ଘଟଣା ବାଲେଶ୍ଵର ଜିଲ୍ଲା ବାଲିଆପାଳ ବ୍ଲକ ଅନ୍ତର୍ଗତ ଶ୍ରୀରାମପୁର ପଞ୍ଚାୟତର ମହିଁଷାମୁଣ୍ଡା ଗାଁରେ ଘଟିଛି ।
ସୂଚନାଯୋଗ୍ୟ ଯେ, ବାଲେଶ୍ଵର ଜିଲ୍ଲା ବାଲିଆପାଳ ଥାନା ଶ୍ରୀରାମପୁର ପଞ୍ଚାୟତର ମହିଷାମୁଣ୍ଡା ଗାଁର ଲୁସ୍କୁ ଟୁଡୁଙ୍କ ସ୍ତ୍ରୀଙ୍କୁ ଡାହାଣୀ ସନ୍ଦେହ କରି ଗ୍ରାମବାସୀମାନେ ସପରିବାରକୁ ନିସ୍ତୁକ ମାଡମାରି ଗାଁରୁ ତଡି ଦେଇଛନ୍ତି । ଫଳରେ ସ୍ବାମୀ-ସ୍ତ୍ରୀ ଓ ଛୋଟ ପିଲାଙ୍କୁ ଧରି ଅନ୍ୟ ଏକ ଗାଁ ରାସ୍ତା ତଳେ ବିଛାଯାଇଥିବା ହୋମ୍ ପାଇପ୍ ଭିତରେ ଭୋକ ଉପାସରେ ଆଶ୍ରୟ ନେଇଛନ୍ତି । କିଛି ମାସ ପୂର୍ବରୁ ଲୁସ୍କୁଙ୍କ ବଡ ଭାଇଙ୍କ ଦୁଇ ପୁଅଙ୍କର ରୋଗରେ ମୃତ୍ୟୁ ହୋଇଥିଲା । ତେବେ ସେମାନଙ୍କ ମୃତ୍ୟୁର କାରଣ ଲୁସ୍କୁର ସ୍ତ୍ରୀ ବୋଲି ସନ୍ଦେହ କରିଥିଲେ ଲୁସ୍କୁଙ୍କ ବଡଭାଇ । ସେ ଡାହାଣୀ ହୋଇ ଦୁଇ ପିଲାଙ୍କୁ ମାରି ଦେଇଛି ବୋଲି ଭାବି ନେଇଥିଲେ । ତେବେ ଏକଥା ଲୁସ୍କୁଙ୍କ ବଡ଼ଭାଇ ଗ୍ରାମବାସୀଙ୍କୁ ଜଣାଇବା ପରେ ଗ୍ରାମବାସୀମାନେ ଲୁସ୍କୁଙ୍କ ଘରେ ପହଞ୍ଚି ସେମାନଙ୍କୁ ମୟୁରଭଞ୍ଜ ର ଜନୈକ ତାନ୍ତ୍ରିକ ପାଖକୁ ନେଇଯାଇଥିଲେ । ତାନ୍ତ୍ରିକ ଜଣଙ୍କ ପୂଜାପାଠ କରିବା ପରେ ଡାହାଣୀ ବୋଲି ଗ୍ରାମବାସୀମାନଙ୍କୁ କହିଥିଲେ ।
ଏହାପରେ ଗ୍ରାମବାସୀମାନେ ଉଭୟ ସ୍ବାମୀ-ସ୍ତ୍ରୀଙ୍କୁ ମାରପିଟ୍ କରିବା ସହିତ ସେଡାହାଣୀ ବୋଲି ଜୋରଜରଦସ୍ତ ସାଦା କାଗଜରେ ଲେଖି ଟିପଚିହ୍ନ ନେଇଥିଲେ । ଏହାପରେ ଗ୍ରାମବାସୀମାନେ ଧମକଚମକ ଦେଇ ଉଭୟ ସ୍ବାମୀ-ସ୍ତ୍ରୀଙ୍କୁ ଗ୍ରାମରୁ ତଡି ଦେଇଛନ୍ତି । ଏମିତିକି ଘରୁ କୌଣସି ଜିନିଷ ପତ୍ର ମଧ୍ୟ ଆଣିବାକୁ ଦେଇ ନାହାନ୍ତି । ଫଳରେ ସେମାନେ ଭୟରେ ଗାଁରୁ ପଳାଇ ଆସି ଅନ୍ୟ ଏକ ଗାଁରେ ରାସ୍ତା ତଳେ ବିଛାଯାଇଥିବା ହୋମ୍ ପାଇପ୍ ତଳେ ଆଶ୍ରୟ ନେଇଛନ୍ତି । ପାଖରେ ପଇସା ପତ୍ର କି ଲୁଗାପଟା କିଛି ନଥିବାରୁ ଭୋକ ଉପାସରେ ହାଡଭଙ୍ଗା ଶୀତ କାକରରେ ଅତ୍ୟନ୍ତ ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି ।
ଅଭିଯୋଗ କଲେ ଗ୍ରାମବାସୀମାନେ ଜୀବନରୁ ମାରିଦେବାକୁ ଧମକ ଦେଇଛନ୍ତି ବୋଲି କହିଛନ୍ତି ଲୁସ୍କୁ ଏବଂ ତାଙ୍କ ସ୍ତ୍ରୀ । ଖୁବ୍ ଶୀଘ୍ର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ଥାନୀୟ ସରପଞ୍ଚ କହିଛନ୍ତି ।
