କଟକ ୭।୧୦: ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବିରୋଧରେ ନିର୍ବାଚନ ମାମଲାକୁ ରଦ୍ଦ କରିଛନ୍ତି ହାଇକୋର୍ଟ । ନିମ୍ନ ଅଦାଲତରେ ତାଙ୍କ ବିରୋଧରେ ଏହି ମାମଲା ଚାଲିପାରିବନି ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ ଯେ, ନିର୍ବାଚନ ସମୟରେ ଦିବ୍ୟଶଙ୍କର ମିଶ୍ର ଦାଖଲ କରିଥିବା ସତ୍ୟପାଠରେ ତଥ୍ୟ ଲୁଚାଇ ଥିବା ଅଭିଯୋଗ ହୋଇଥିଲା । ତାଙ୍କ ପ୍ରତିଦ୍ବନ୍ଦୀ ତଥା କଂଗ୍ରେସରୁ ପ୍ରାର୍ଥୀ ହୋଇଥିବା ଗୋବର୍ଦ୍ଧନ ଦାସ ଜୁନାଗଡା ମାଜିଷ୍ଟ୍ରେଟଙ୍କ ନିକଟରେ ମାମଲା ରୁଜୁ କରିଥିଲେ । ମାଜିଷ୍ଟ୍ରେଟ ଏହି ମାମଲାକୁ ବିଚାର ପାଇଁ ଗ୍ରହଣ କରିଥିଲେ । ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବିରୋଧରେ ନିର୍ବାଚନୀ ମାମଲା ଆରମ୍ଭ ହୋଇଥିଲା । ତେବେ ନିମ୍ନ ଅଦାଲତଙ୍କ ଏହି ନିଷ୍ପତ୍ତିକୁ ଚାଲେଞ୍ଜ କରି ଦିବ୍ୟଶଙ୍କର ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ । ହାଇକୋର୍ଟ ଦିବ୍ୟଶଙ୍କରଙ୍କ ଆବେଦନକୁ ଗ୍ରହଣ କରି ତାଙ୍କ ବିରୋଧରେ ମାମଲା ଚାଲି ପାରିବନାହିଁ ବୋଲି ନିର୍ଦ୍ଦେଶ ଦେଇଛନ୍ତି ।