ଖୋର୍ଦ୍ଧା ୧୫।୧୧: ରେଳ ଧାରଣା ନିକଟ ଏକ ଗଛରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ଖୋର୍ଦ୍ଧା ସଦର ଥାନା ଅନ୍ତର୍ଗତ ଦୁର୍ଗାପୁର ପଞ୍ଚାୟତର ବୋତଳମା ନିକଟରୁ ଉଦ୍ଧାର ହୋଇଛି । ମୃତ ଯୁବକ ହେଲେ ଆଠଗଡ଼ ଅଞ୍ଚଳର ବିଜୟ ବେହରା । ସେ ଦୀର୍ଘ ଦିନ ଧରି ଖୋର୍ଦ୍ଧା କଲେକ୍ଟର ଅଫିସ ନିକଟସ୍ଥ କୌଣାର୍କ ନଗରରେ ତାଙ୍କ ଶ୍ବଶୁର ଘରେ ରହିଆସୁଥିଲେ । କିନ୍ତୁ ଅଧିକ ଧାରକରଜ କରିଥିବାରୁ ସେ ମାନସିକ ଭାରସାମ୍ୟ ହରାଇ ଏପରି କରିଥିବା ସୂଚନା ମିଳିଛି ।
ସୋମବାର ସକାଳୁ ସଦର ଥାନା ଅନ୍ତର୍ଗତ ବୋତଳମା ରେଳ ଧାରଣା ନିକଟ ଏକ ଗଛରେ ଜଣେ ଯୁବକଙ୍କ ମୃତଦେହ ଝୁଲୁଥିବା ଦେଖିଥିଲେ ଗ୍ରାମବାସୀ । ପାଖରେ ଏକ ଗାଡ଼ି ଥିବା ମଧ୍ୟ ଦେଖିବାକୁ ମିଳିଥିଲା । ମୃତଦେହ ଦେଖି ଗ୍ରାମବାସୀ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରି ଖୋର୍ଦ୍ଧା ମେଡିକାଲ କୁ ବ୍ୟବଚ୍ଛେଦ ପାଇଁ ପଠାଇ ଅଧିକ ତଦନ୍ତ ଜାରି ରଖିଛି ।