Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ସାବାସ୍ ପୋଲିସ : ଜିଆରପି କନଷ୍ଟେବଲଙ୍କ ଉପସ୍ଥିତ ବୁଦ୍ଧି ଯୋଗୁଁ ବଞ୍ଚିଗଲେ ଅସୁସ୍ଥ ରେଳଯାତ୍ରୀ, ଦେଖନ୍ତୁ ଭିଡିଓ

20/09/2018 at 7:05 PM

ଭୁବନେଶ୍ବର୨୦|୯: ସାଧାରଣରେ ପୋଲିସ ପ୍ରତି ଏକ ଭିନ୍ନ ନଜରିଆ ଦେଖିବାକୁ ମିଳେ । ହେଲେ ଭୁବନେଶ୍ବର ଜିଆରପିର ଜଣେ କନଷ୍ଟେବଳଙ୍କ ଉଦ୍ୟମ ଯୋଗୁଁ ଜଣେ ବ୍ୟକ୍ତିଙ୍କ ଜୀବନ ବଞ୍ଚିଯାଇଛି । ସେକଥା ଦେଖିବା ପରେ କିଛି ଲୋକଙ୍କ ମନ ଭିତରେ ପୋଲିସ ପ୍ରତି ଥିବା ମାନସିକତା ହୁଏତ ବଦଳିଯାଇପାରେ ।
ସମୟ ରାତି ପ୍ରାୟ ୧୨ଟା । ଭୁବନେଶ୍ବର ରେଲଓ୍ବେ ଷ୍ଟେସନର ୧ନମ୍ବର ପ୍ଲାଟଫର୍ମରେ ଟ୍ରେନ୍ ଲାଗିବା ପରେ ସେଥିରୁ ଓହ୍ଲାଇଥିବା ଯାତ୍ରୀଙ୍କ ମଧ୍ୟରୁ ଜଣେ ବ୍ୟକ୍ତି ପ୍ଲାଟଫର୍ମ ଉପରେ ହଠାତ୍ ପଡ଼ିଯାଇଥିଲେ । ହେଲେ ଅଚେତ୍ ଅବସ୍ଥାରେ ପଡ଼ିଥିବା ସେଇ ବ୍ୟକ୍ତିଙ୍କ ପାଖରେ ପହଞ୍ଚି ଯାଇଥିଲେ ଜିଆରପି କନଷ୍ଟେବଲ ବଳରାମ ସିଂହ । ସଂପୃକ୍ତ ବ୍ୟକ୍ତିଙ୍କୁ ହାର୍ଟ ଆଟାକ୍ ହୋଇଥିବା ଅନୁମାନ କରି ତାଙ୍କ ପାଖରେ ବସିପଡ଼ି ଛାତିକୁ ମାଲିସ କରିବା ସହ ମୁହଁରେ ମୁହଁ ଲଗାଇ ଫୁଙ୍କିବାକୁ ଚେଷ୍ଟା କରିଥିଲେ । କିଛି ସମୟ ଏଭଳି କରିବା ପରେ ସଂପୃକ୍ତ ବ୍ୟକ୍ତି ଜଣକ ହାତଗୋଡ଼ ହଲାଇବା ଦେଖିବାକୁ ମିଳିଥିଲା । ଆଉ ବ୍ୟକ୍ତି ଜଣକ ସୁସ୍ଥ ଅନୁଭବ କରିଥିଲେ । ଜଣେ କନଷ୍ଟେବଲଙ୍କ ଉଦ୍ୟମ ଯୋଗୁଁ ବଞ୍ଚିଯାଇଥିଲା ଏହି ବ୍ୟକ୍ତିଙ୍କ ଜୀବନ । ଯାହାକୁ ନେଇ ସଂପୃକ୍ତ କନଷ୍ଟେବଲଙ୍କୁ ସାବାସି ଦେଇଥିଲେ ବିଭାଗୀୟ ଅଫିସର । ପୋଲିସ କେବଳ ଅପରାଧ ନିୟନ୍ତ୍ରଣ ପାଇଁ ନିଜ କର୍ତ୍ତବ୍ୟ କରେନି ।ବରଂ ସାଧାରଣ ଲୋକଙ୍କ ଜୀବନ ରକ୍ଷା ଦିଗରେ ମଧ୍ୟ ଅନେକ ଥର ପୋଲିସ କର୍ମୀଙ୍କ ଭୂମିକା ଗୁରୁତ୍ବ ବହନ କରିଛି । ଏହାକୁ ଦେଖିବା ପରେ କିଛି ଲୋକଙ୍କ ମନରେ ପୋଲିସ ପ୍ରତି ଥିବା ମାନସିକତାରେ ନିଶ୍ଚିତ ପରିବର୍ତ୍ତନ ଆସିବ ବୋଲି ଆମେ ଭାବୁଛୁ ।

   Related Posts