Thursday, March 21, 2019

News7

Prameya News7, News7 Odia, Odisha Latest News, Odisha Current Headlines, Odisha News Online

ବିଏସଏନଏଲରେ ହେଲାଣି ୩୧,୨୮୭ କୋଟି ଟଙ୍କାର କ୍ଷତି, କମ୍ପାନୀକୁ ବନ୍ଦ କରିବା ପାଇଁ ଯୋଜନା

ନୂଆଦିଲ୍ଲୀ ୧୪|୨:  କ୍ଷତିରେ ଚାଲୁଥିବା ସରକାରୀ ଦୂରସଞ୍ଚାର କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ୍ (ବିଏସଏନଏଲ)କୁ ବନ୍ଦ କରିବା ପାଇଁ ଚାଲିଛି ଯୋଜନା । ତେବେ ତା ପୂର୍ବରୁ ଦୂରସଞ୍ଚାର କ୍ଷେତ୍ରରେ ତିଷ୍ଠି ରହିବା ପାଇଁ ବିଭିନ୍ନ ବିକଳ୍ପ ଉପରେ ଧ୍ୟାନ ଦେବା ପାଇଁ କମ୍ପାନୀକୁ ସରକାର କହିଛନ୍ତି । ଏ ସମ୍ପର୍କରେ କମ୍ପାନୀଠାରୁ ଏକ ରିପୋର୍ଟ ମଧ୍ୟ ସରକାର ମାଗିଛନ୍ତି ।

ଖବର ଅନୁସାରେ ସମସ୍ତ ବିଷୟ ପ୍ରତି ଧ୍ୟାନ ରଖିବାକୁ ସରକାରଙ୍କ ପକ୍ଷରୁ କମ୍ପାନୀକୁ କୁହାଯାଇଛି । ଯାହା ଫଳରେ କମ୍ପାନୀ ପୁଣି ଥରେ ତା ପୁରୁଣା ସ୍ଥିତିକୁ ଫେରିପାରିବ । ଏହା ବ୍ୟତୀତ କମ୍ପାନୀରେ କିଭଳି କମ୍ ପୁଞ୍ଜି ବିନିଯୋଗ ହୋଇପାରିବ ବା କମ୍ପାନୀକୁ ସଂପୂର୍ଣ୍ଣ ବନ୍ଦ କରାଯିବ ନେଇ ବିଚାର ମଧ୍ୟ କରିବାକୁ ପଡିବ ।

ଦୂରସଞ୍ଚାର ସଚିବ ଅରୁଣା ସୁନ୍ଦରରାଜନ ବିଏସଏନଏଲର ବରିଷ୍ଠ ଅଧିକାରୀଙ୍କ ସହ କଥାବାର୍ତ୍ତା କରିଛନ୍ତି ।  ବିଏସଏନଏଲର ଚେୟାରମ୍ୟାନ ଅନୁପମ ଶ୍ରୀବାସ୍ତବ ଦୂରସଞ୍ଚାର ସଚିବଙ୍କୁ କମ୍ପାନୀର ଆର୍ଥିକ ସ୍ଥିତି, କମ୍ପାନୀର କ୍ଷତି, ରିଲାଏନ୍ସ ଜିଓ ଆସିବା ପରେ କମ୍ପାନୀର ବ୍ୟବସାୟ ଉପରେ ପଡୁଥିବା ପ୍ରଭାବ, ସ୍ବେଚ୍ଛାକୃତ ଅବସର ଏବଂ ଅବସର ଯୋଜନା ସଂପର୍କରେ ସମସ୍ତ ସୂଚନା ଦେଇଛନ୍ତି । ବିଏସଏନଏଲକୁ ୨୦୧୭-୧୮ରେ ୩୧,୨୮୭ କୋଟି ଟଙ୍କାର କ୍ଷତି ସହିବାକୁ ପଡିଥିଲା ବୋଲି ମଧ୍ୟ ସୂଚନା ମିଳିଛି ।

କମ୍ପାନୀଙ୍କୁ ପୁଣି ଥରେ ପୁରୁଣା ସ୍ଥିତିକୁ ଫେରାଇ ଆଣିବା ପାଇଁ ଉଦ୍ୟମ ସହିତ କମ୍ପାନୀକୁ ସଂପୂର୍ଣ୍ଣ ଭାବେ ବନ୍ଦ କରିବା ବିକଳ୍ପ ସମ୍ପର୍କରେ ବିଚାର କରିବା ପାଇଁ ମଧ୍ୟ କୁହାଯାଇଛି । ସରକାର କମ୍ପାନୀଠାରୁ ଏ ସମ୍ବନ୍ଧରେ ଏକ ରିପୋର୍ଟ ମଧ୍ୟ ମାଗିଛନ୍ତି ।

କମ୍ପାନୀକୁ ଅନ୍ୟ କମ୍ପାନୀଠାରୁ ଅଧିକ ପ୍ରତିନ୍ଦ୍ବନ୍ଦିତା ମିଳିଛି । ଏହା ବ୍ୟତୀତ କମ୍ପାନୀରେ ଅଧିକ ସଂଖ୍ୟକ କର୍ମଚାରୀ ମଧ୍ୟ ରହିଛନ୍ତି । ରିପୋର୍ଟ ଅନୁସାରେ ବିଏସଏନଏଲରେ ଏବେ ୧.୮ଲକ୍ଷ କର୍ମଚାରୀ ଅଛନ୍ତି । ଯାହା ଅନ୍ୟ କମ୍ପାନୀ ତୁଳନାରେ ୬ଗୁଣ ଅଧିକ । ବିଏସଏନଏଲ ତରଫରୁ କର୍ମଚାରୀଙ୍କ ସଂଖ୍ୟା କମ୍ କରିବା, ସେମାନଙ୍କଠାରୁ ଭିଆରଏସ ଦେବା ଏବଂ ଅବସର ସମୟ ସୀମା ୬୦ରୁ ହ୍ରାସ କରି ୫୮ବର୍ଷ କରିବାକୁ କମ୍ପାନୀ ସରକାରଙ୍କୁ ପରାମର୍ଶ ଦେଇଛି ।

ଯଦି ଆର୍ଥିକ ବର୍ଷ ୨୦୧୯-୨୦ରେ ଅବସର ବୟସ ସୀମା ହ୍ରାସ କରାଯାଏ ତେବେ ପାଖାପାଖି ୩,୦୦୦ କୋଟି ଟଙ୍କାର ସଞ୍ଚୟ ହେବ । ଅବସର ସମୟ ସୀମା ହ୍ରାସ କରାଗଲେ ୬୭ ହଜାର କର୍ମଚାରୀ କମ୍ ହୋଇଯିବେ । ଯଦି ଏଥିରୁ ଅଧା କର୍ମଚାରୀ ଭିଆରଏସ ନିଅନ୍ତି ତେବେ ୩ହଜାର କୋଟିର ସଞ୍ଚୟ ହେବ । ସେମାନଙ୍କୁ ଦିଆଯିବାକୁ ଥିବା କ୍ଷତିପୂରଣ ୬୯୦୦ କୋଟି ଟଙ୍କାରୁ ୬୩୦୦କୋଟି ଟଙ୍କା ମଧ୍ୟରେ ହେବ ।

ବିଏସଏନଏନ ପକ୍ଷରୁ କୁହାଯାଇଛି ଯେ, କମ୍ପାନୀ ଅଧିନରେ ଥିବା ଭବନ ଏବଂ ଜମି ବିକ୍ରି କରି ପାଖାପାଖି ୧୫ହଜାର କୋଟି ଟଙ୍କା ଜମା କରାଯାଇପାରିବ । କମ୍ପାନୀର କର୍ମଚାରୀଙ୍କୁ ମିଳିବାକୁ ଥିବା ସୁବିଧାସୁଯୋଗକୁ ମଧ୍ୟ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି ।

୨୦୧୬ ମସିହାରେ ରିଲାଏନ୍ସ ଜିଓ ଟେଲିକମ୍ କ୍ଷେତ୍ରରେ ପ୍ରବେଶ କରିବା ପରେ ବିଏସଏନଏଲ କ୍ଷତିରେ ଚାଲିଛି । ଏବେ କେବଳ ତିନୋଟି ଘରୋଇ କମ୍ପାନୀ ଭାରତୀୟ ଟେଲିକମ୍ ମାର୍କେଟ୍ ରେ ରହିଛନ୍ତି । ରିଲାଏନ୍ସ ଜିଓ, ଭାରତୀ ଏୟାରଟେଲ ଏବଂ ଭୋଡାଫୋନ୍ ଆଇଡିଆ ନିକଟରେ ଦୂରସଞ୍ଚାର କ୍ଷେତ୍ରର ୯୦ପ୍ରତିଶତ ରାଜସ୍ବ ଏବଂ ୮୦ପ୍ରତିଶତ ସ୍ପେକ୍ଟ୍ରମ ହୋଲ୍ଡିଂ ରହିଛି ।

469 Views

   ସମ୍ବନ୍ଧିତ ଖବର