ନୂଆଦିଲ୍ଲୀ,୨୨/୦୧ : ଗୋଆରେ ଗତ ୫ ବର୍ଷରେ ୨୪ ବିଧାୟକ ଗୋଟିଏ ଦଳ ଛାଡି ଅନ୍ୟ ଦଳରେ ସାମିଲ ହୋଇଛନ୍ତି । ଏହି ସଂଖ୍ୟା ୪୦ ଆସନ ବିଶିଷ୍ଟ ଗୋଆ ବିଧାନସଭାର ୬୦ ପ୍ରତିଶତ । ଆସୋସିଏସନ ଅଫ ଡେମୋକ୍ରେଟିକ୍ ରିଫର୍ମ ପକ୍ଷରୁ ଏହି ସୂଚନା ଦିଆଯାଇଛଇ । ଏହାସହ ଏଡିଆର କହିଛି, ଗୋଆ ଏହି ମାମଲାରେ ଏକ ବିଚିତ୍ର ରେକର୍ଡ ସ୍ଥାପନ କରିଛି । ଭାରତୀୟ ଗଣତନ୍ତ୍ରର ଇତିହାସରେ ଏହିପରି ଦ୍ୱିତୀୟ ମାମଲା ନାହିଁ।
ଗୋଆରେ ଆସନ୍ତା ୧୪ ତାରିଖରେ ବିଧାନସବା ନିର୍ବାଚନ ପାଇଁ ମତଦାନ ହେବ। ରିପୋର୍ଟରେ କୁହାଯାଇଛି, ବର୍ତ୍ତମାନର ବିଧାନସଭା (୨୦୧୭-୨୦୨୨)ର ପାଞ୍ଚ ବର୍ଷ ଭିତରେ ପ୍ରାୟ ୨୪ ଜଣ ବିଧାୟକ ଦଳ ପରିବର୍ତ୍ତନ କରିଛନ୍ତି । ଭାରତର ଇତିହାସରେ ଏହିପରି କେବେ ହୋଇ ନଥିଲା । ଜନାଦେଶର ଘୋର ଅପମାନ ହେଉଥିବା ସ୍ପଷ୍ଟ ଦେଖିବାକୁ ମିଳୁଛି । ଏବଂ ଲୋଭ, ନୈତିକ ଦୃଷ୍ଟିକୋଣ ଏବଂ ଅନୁଶାସନ ଉପରେ ଭାରୀ ପଡୁଥିବା ଦେଖୁବାକୁ ମିଳୁଛି।
୨୦୧୯ରେ ୧୦ ଜଣ କଂଗ୍ରେସ ବିଧାୟକ ଦଳ ଛାଡି ବିଜେପିରେ ସାମିଲ ହୋଇଥିଲେ । ଏଥିରେ ବିରୋଧୀ ଦଳ ନେତା ଚନ୍ଦ୍ରକାନ୍ତ କାବଲେକର ମଧ୍ୟ ସାମିଲ ଥିଲେ । ଏହାସହ ଏମଜିପିର ବିଧାୟକ ଦୀପକ ପୋକ୍ସର ଏବଂ ମନୋହର ଅଜଙ୍ଗାୱକର ମଧ୍ୟ ବିଜେପିରେ ସାମିଲ ହୋଇଥିଲେ। ସାଲିଗାଁଓରୁ ଗୋଆ ଫରୱାର୍ଡ ପାର୍ଟିର ବିଧାୟକ ଜୟେଶ ସାଲଙ୍ଗାୱକର ମଧ୍ୟ ପଦ୍ମ ଦଳରେ ସାମିଲ ହୋଇଥିଲେ । ନିକଟରେ ଗୋଆର ପୂର୍ବତନ ମୁଖ୍ୟମନ୍ତ୍ରୀ ତଥା ପୋଣ୍ଡାରୁ କଂଗ୍ରେସର ବିଧାୟକ ରବି ନାଇକ ମଧ୍ୟ ବିଜେପିରେ ସାମିଲ ହୋଇଥିଲେ।