ଜଳେଶ୍ବର ୨୬।୧୨: ବାଲେଶ୍ବର ଜିଲ୍ଲା ବସ୍ତା ଥାନା ୬୦ନଂ ଜାତୀୟ ରାଜପଥ କିଆପଣସି ଛକ ନିକଟରେ ଏକ ବାଇକକୁ ଧକ୍କା ଦେଇ ନୟନଜୋରୀକୁ ଖସି ପଡିଥିବା କାରରୁ ବିପୁଳ ପରିମାଣର ଗଞ୍ଜେଇ ଜବତ କରିଛି ବସ୍ତା ପୋଲିସ । ଶୁକ୍ରବାର ଅପରାହ୍ନରେ ଇନ୍ଦିରା ଛକ ନିକଟରେ ଏକ ବାଇକକୁ ଧକ୍କା ଦେଇ ୨୦ ଫୁଟ ତଳକୁ ଖସି ଯାଇଥିଲା । ପରେ ଖବର ପାଇ ସ୍ଥାନୀୟ ଲୋକେ କାରରେ ଥିବା ଲୋକଙ୍କୁ ଉଦ୍ଧାର କରିବା ସହ ବସ୍ତା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇ ଥାନାକୁ ଖବର ଦେଇଥିଲେ ।
ଖବର ପାଇ ଆମାର୍ଦ୍ଦାରୋଡ଼ ଫାଣ୍ଡି ଅଧିକାରୀ ରସାନନ୍ଦ ବେହେରା ଘଟଣା ସ୍ଥଳରେ ପହଞ୍ଚି କାରଟିକୁ ନୟନ ଯୋଡିରୁ କ୍ରେନ୍ ଯୋଗେ ଉଠାଇବା ପରେ ଉକ୍ତ କାରର ପଛପଟ ଡିକିରେ ଗଞ୍ଜେଇ ଥିବା ପୋଲିସ ଜାଣିବାକୁ ପାଇଥିଲା । ପରେ ଏହି କାରରେ ଥିବା ଚାଳକଙ୍କୁ ପୋଲିସ ଖୋଜିବା ବେଳକୁ ସେ ଫେରାର ହୋଇଥିବା ଜଣାଯାଇଥିଲା।
କାର୍ ଟି ବାଲେଶ୍ବର ପଟୁ ଜଳେଶ୍ଵର ଆଡକୁ ଯାଉଥିବା ବେଳେ ଉକ୍ତ କାରରେ ନମ୍ବର ପ୍ଲେଟ୍ ନଥିଲା । ତେବେ ଏ ଗାଡିଟି ପଶ୍ଚିମବଙ୍ଗର ମୁର୍ସିଦାବାଦ ଆରଟିଓ ଅଫିସରୁ ରେଜିଷ୍ଟ୍ରେସନ ହୋଇଥିବା ବେଳେ ଗାଡିରେ କୌଣସି ନମ୍ବର ପ୍ଲେଟ୍ ନଥିବା ଜଣାପଡିଥିଲା । ତେବେ ସକାଳ ସମୟରେ ବସ୍ତା ଥାନା ଅଧିକାରୀ ଅଶୋକ କୁମାର ନାୟକ ଏବଂ ବସ୍ତା ତହସିଲଦାର କାର୍ତ୍ତିକ ଚନ୍ଦ୍ର ଦାସ ପହଞ୍ଚି ମାରୁତି କାରରୁ ୬୨ କିଲୋ ୭୫୦ଗ୍ରାମ ଗଞ୍ଜେଇ ଜବତ କରିଥିଲେ।
