ଲମତାପୁଟ, ୨୪/୦୬: ଗଞ୍ଜେଇ ଚୋରା ଚାଲାଣ ବେଳେ ମାଫିଆଙ୍କୁ ମାଡି ବସିଲା ମାଛକୁଣ୍ଡ ପୋଲିସ ।ମାଲକାନଗିରି ସୀମାନ୍ତରୁ ଭୁବନେଶ୍ୱର ଚୋରା ଚାଲଣ ବେଳେ ମାଛକୁଣ୍ଡ ପୋଲିସ ହାତରେ ଧରା ପଡିଛି ବିପୁଳ ପରିମାଣର ଗଞ୍ଜେଇ ।
ବିଶେଷ ସୂତ୍ରରୁ ଖବର ପାଇ କୋରାପୁଟ ଏସପିଙ୍କ ନିର୍ଦେଶ କ୍ରମେ ନନ୍ଦପୁର ଏସ.ଡ଼ି.ପିଓଙ୍କ ନେତୃତ୍ଵରେ ମାଛକୁଣ୍ଡ ପୋଲିସ ଚାଙ୍ଗୁଡ଼ିପଡ଼ା ଗ୍ରାମ ନିକଟରେ ନାକାବନ୍ଦୀ କରିଥିଲା । ମାଛକୁଣ୍ଡ ଅଞ୍ଚଳରୁ ଦ୍ରୁତ ଗତିରେ ଆସୁଥିବା ଏକ କାରକୁ ଅଟକାଇ ଥିଲା ପୋଲିସ । କାରଟି ପୋଲିସ ଗାଡ଼ିକୁ ଧକ୍କା ଦେଇ ଚାଙ୍ଗୁଡ଼ିପଡା ଗ୍ରାମ ନିକଟ ଜଙ୍ଗଲକୁ ଦୃତ ଗତିରେ ଚାଲି ଯାଇଥିଲା । ପୋଲିସ ପିଛା କରିବା ଦେଖି ଦୃତ ଗତିରେ ଯାଉଥିବା କାରଟି କାଦୁଅରେ ପଶି ଯାଇଥିଲ । କାର ଆଗକୁ ନ ଯିବାରୁ ଦେଖି ଦୁଇ ଗଞ୍ଜେଇ ମାଫିଆ ଗାଡ଼ି ଛାଡ଼ି ଜଙ୍ଗଲ ଭିତରକୁ ଚମ୍ପଟ ମାରିଥିଲେ ।
ଅନ୍ୟପକ୍ଷରେ କାରକୁ ଏସ୍କର୍ଟ କରି ଆସୁଥିବା ମୋଟର ସାଇକେଲ ଚାଳକଙ୍କୁ କାବୁ କରିବାରେ ସଫଳ ହୋଇଥିଲା ପୋଲିସ । ମୋଟର ସାଇକେଲକୁ ଜବତ କରିବା ପରେ କାରକୁ ଯାଞ୍ଚ କରିବାରୁ ଏକ କୁଇଣ୍ଟାଲ ଗଞ୍ଜେଇ ଥିବା ଜାଣିବାକୁ ପାଇଥିଲା ପୋଲିସ । ଏହାର ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା ହେବ ବୋଲି ପୋଲିସ କହିଛି । ଗିରଫ ଯୁବକ ଜଣକ ମାଲକାନଗରି ଜିଲ୍ଲା ଅଣ୍ଡରହାଲ୍ ଗ୍ରାମର ରଘୁ ହେନ୍ତାଳ ବୋଲି ଜଣା ପଡିଛି । ଯୁବକକୁ ପଚରା ଉଚରା ପରେ ସ୍ଥାନୀୟ ଯୁବକଙ୍କ ସଂପୃକ୍ତି ଥିବା ପୋଲିସ ଜାଣିବାକୁ ପାଇଥିବା ବେଳେ ସେମାନଙ୍କ ନାମ ଗୋପନ ରଖିଛି ।
ସୂଚନାଯୋଗ୍ୟ, ଚଳିତ ବର୍ଷ ମାଛକୁଣ୍ଡ ପୋଲିସ ଆଜି ପର୍ଯ୍ୟନ୍ତ ୨୩ଟି ଗଞ୍ଜେଇ କାରବାରର ପର୍ଦ୍ଦାଫାସ କରିଥିବା ବେଳେ ୩୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହାସହ ସମୁଦାୟ ୫ ଟନ ୫୫୭ କେଜି ଗଞ୍ଜେଇ ଜବତ କରିଥିବା ବେଳେ ୨୦ ଟି ଗାଡି ଜବତ କରାଯାଇଛି ।