ନୂଆଦିଲ୍ଲୀ ୧୭|୩ : ଭାରତର ପ୍ରଥମ ଲୋକପାଳ ମନୋୟନ ଚୂଡାନ୍ତ ହୋଇଛି । ସୁପ୍ରିମକୋର୍ଟ ପୂର୍ବତନ ବିଚାରପତି ପିନାକି ଚନ୍ଦ୍ର ଘୋଷ ହେବେ ଭାରତର ପ୍ରଥମ ଲୋକପାଳ । ଏନେଇ କାଲି ବିଧିବଦ୍ଧଭାବେ ଘୋଷଣା ହେବ । ଏଥିସହିତ ୮ ସଦସ୍ୟଙ୍କ ଚୟନ ଆସନ୍ତା ସପ୍ତାହ ସୁଦ୍ଧା ହେବ । ୨୦୧୪ରେ ଲୋକପାଳ ଆଇନ ପ୍ରଣୟନ କରାଯାଇଥିଲା । ହେଲେ ମୋଦି ସରକାର ଏଯାଏଁ କାହାରିକୁ ଲୋକପାଳଭାବେ ନିଯୁକ୍ତ କରିନଥିଲେ ।
ଏନେଇ ସୁପ୍ରିମକୋର୍ଟରେ ଏନଜିଓ କମନ କଜ୍ ଏକ ଜନସ୍ବାର୍ଥ ମାମଲା ରୁଜୁ କରିଥିଲା । ଏବେ ସଂଗଠନ ପାଇଁ ଓକିଲାତି କରୁଥିବା ପ୍ରଶାନ୍ତ ଭୂଷଣ ଲୋକପାଳ ନିଯୁକ୍ତି ପାଇଁ ଦାବି କରିଆସୁଥିଲେ । ମାର୍ଚ୍ଚ ୭ରେ ସୁପ୍ରିମକୋର୍ଟ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କ ଖଣ୍ଡପୀଠେ ଏହି ମାମଲାର ଶୁଣାଣି କରିଥିଲେ । ମୋଦି ସରକାର କେବେ ଲୋକପାଳ ପଦବୀ ପାଇଁ ପ୍ରାର୍ଥୀ ଚୟନ ଚୂଡାନ୍ତ କରିବେ ୧୫ ଦିନ ଭିତରେ କୋର୍ଟଙ୍କୁ ଜଣାଇବାକୁ ନିର୍ଦେଶ ଦେଇଥିଲେ ।
ବିଚାରପତି ପି ସି ଘୋଷ ଏବେ ଜାତୀୟ ମାନବାଧିକାର କମିଶନର ସଦସ୍ୟ ଅଛନ୍ତି। ୮ ମାର୍ଚ୍ଚ ୨୦୧୩ରୁ ୨୭ ମଇ ୨୦୧୭ ପର୍ଯ୍ୟନ୍ତ ସେ ସୁପ୍ରିମକୋର୍ଟର ବିଚାରପତି ଥିଲେ। ଏହା ପୂର୍ବରୁ ଜଷ୍ଟିସ ଘୋଷ ଆନ୍ଧ୍ରପ୍ରଦେଶ ହାଇକୋର୍ଟ ମୁଖ୍ୟ ବିଚାରପତି, କଲିକତା ହାଇକୋର୍ଟ ମୁଖ୍ୟ ବିଚାରପତିଭାବେ ଦାୟିତ୍ବ ତୁଲାଇଛନ୍ତି।