କଲିକତା ୧୩/୮ : ଲୋକସଭାର ପୂର୍ବତନ ବାଚସ୍ପତି ସୋମନାଥ ଚାଟାର୍ଜୀଙ୍କ ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୮୯ ବର୍ଷ ବୟସ ହୋଇଥିଲ । ସେ କିଡନୀ ରୋଗରେ ଆକ୍ରାନ୍ତ ଥିଲେ । ଦେହ ଅସୁସ୍ଥ ହେବାରୁ ସୋମନାଥଙ୍କୁ ଦକ୍ଷିଣ କଲିକତାର ଏକ ନର୍ସିଂହୋମରେ ଭର୍ତ୍ତି କରାଯାଇଥିଲା ।ଗତ ୮ ତାରିଖରୁ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା । ଆଜି ତାଙ୍କର ମୃତ୍ୟୁ ହୋଇଛି । ୧୯୨୯ମସିହା ଜୁଲାଇ ୨୫ତାରିଖରେ ଆସାମ ତେଜପୁରରେ ସେ ଜନ୍ମଗ୍ରହଣ କରିଥିଲେ । ୧୯୬୮ ମସିହାରେ ସେ ରାଜନୀତି ଦୁନିଆରେ ପାଦ ଦେଇଥିଲେ। ସେ ୧୦ ଥର ଲୋକସଭା ସାଂସଦ ଭାବେ ନିର୍ବାଚିତ ହୋଇଥିଲେ ଓ ସିପିଆଇ (ଏମ୍‌)ର କେନ୍ଦ୍ରୀୟ କମିଟି ସଦସ୍ୟ ଥିଲେ । ୧୯୯୬ରେ ଉତ୍କୃଷ୍ଟ ସାଂସଦର ପୁରଷ୍କାର ମିଳିଥିଲା । ସେ ୨୦୦୪ରୁ ୨୦୦୯ ଯାଏଁ ଲୋକସଭା ବାଚସ୍ପତି ଥିଲେ । ଉପା-୧ ସରକାରରୁ ତାଙ୍କ ଦଳ ସମର୍ଥନ ପ୍ରତ୍ୟାହାର କରି ନେବା ପରେ ବାଚସ୍ପତି ପଦରୁ ଇସ୍ତଫା ନଦେବାରୁ ଏହି ବର୍ଷିୟାନ୍‌ ନେତାଙ୍କୁ ୨୦୦୮ରୁ ସିପିଆଇ (ଏମ୍‌) ଦଳରୁ ବହିଷ୍କୃତ କରାଯାଇଥିଲା।