ପାଟଣା, ୦୩/୧୦: କେନ୍ଦୁଝର ଜିଲ୍ଲା ପାଟଣା ବନ ବିଭାଗ ପକ୍ଷରୁ ରବିବାର ତୋଣ୍ଡ ବିଟ୍ ଘାଟ ବାଲିଯୋଡି ଗାଁ ନିକଟରେ ଥିବା ହୁଡ଼ିରୁ ୩୮ ଖଣ୍ଡ ଶାଳ ଚୌକାଠ ଜବତ କରାଯାଇଛି । ଜବତ ଶାଳ ଚୌକାଠର ଆନୁମାନିକ ମୂଲ୍ୟ ୫୦ ହଜାର ଟଙ୍କାରୁ ଉର୍ଦ୍ଧ୍ବ ହେବ ବୋଲି ପାଟଣା ରେଞ୍ଜର ଟିକେଶ୍ୱର ମହାନ୍ତ ସୂଚନା ଦେଇଛନ୍ତି ।
ସୂଚନାଯୋଗ୍ୟ ଯେ କାଠ ମାଫିଆ ଚୌକାଠ କାଟି ଚୋରା ଚାଲାଣ କରିବା ପାଇଁ ରଖିଥିବା କୌଣସି ସୂତ୍ରରୁ ବନ ବିଭାଗ ଖବର ପାଇଥିଲା । ଏନେଇ ଚଢ଼ାଉ କରି ଚୌକାଠ ଗୁଡ଼ିକୁ ଜବତ କରିଛି ବିଭାଗ । ଏହି ଚଢ଼ାଉରେ ରେଞ୍ଜର ଟିକେଶ୍ୱର ମହାନ୍ତ, ବନପାଳ ସନାତନ ମିଶ୍ର, ବନରକ୍ଷୀ ପ୍ରଯୁକ୍ତା ଜେନା ଓ ତ୍ରିନାଥ ଜେନାଙ୍କ ସହ ପାରା ସ୍କ୍ୱାର୍ଡ ପ୍ରମୁଖ ସାମିଲ ଥିଲେ।
