ଗଞ୍ଜାମ, ୦୨/୦୪: ଗଞ୍ଜାମ ଜିଲ୍ଲା ଚିକିଟି ବ୍ଲକ ନୁଆଗାଁରେ ବନ ବିଭାଗ ପକ୍ଷରୁ ଅଚାନକ ଚଢାଉ କରାଯାଇ ବିପୁଳ ପରିମାଣରେ ଶାଗୁଆନ କାଠ ଗଣ୍ଡି ଓ ପଟା ଜବତ କରାଯାଇଛି । ଏକ ଘର ମଧ୍ୟରେ କାଠ ଥିବା ଖବର ପାଇ ବନ ବିଭାଗ ଚଢ଼ାଉ କରିଥିବା ଜଣାପଡ଼ିଛି ।
ବିଶେଷ ସୂତ୍ରରୁ ଖବର ପାଇବା ପରେ ବନ ବିଭାଗର ଚାରି ଗୋଟି ଟିମ୍ କାଠ ଏବଂ ପଟା ରଖାଯାଇଥିବା ସ୍ଥାନରେ ଚଢ଼ାଉ କରିଥିଲେ । ସେଠାରେ ଜମା କରି ରଖାଯାଇଥିବା କାଠ ଜବତ କରାଯାଇ ଟ୍ରାକ୍ଟର ଯୋଗେ ଚିକିଟି ବନ ବିଭାଗ ବିଟ୍ ହାଉସକୁ ନିଆଯାଇ ଥିଲା । ଏହି ସଂକ୍ରାନ୍ତରେ ବନ ବିଭାଗ ଜଣଙ୍କୁ ଅଟକ ରଖି ତଦନ୍ତ ଆରମ୍ଭ କରିଥିବା ବେଳେ ଜବତ କାଠର ଆନୁମାନିକ ମୂଲ୍ୟ ଲକ୍ଷେ ଟଙ୍କାରୁ ଉର୍ଦ୍ଧ୍ବ ହେବ ବୋଲି ବନ ବିଭାଗ ସୂଚନା ଦେଇଛି ।