କରଞ୍ଜିଆ, ୨୦/୭: ଶିମିଳିପାଳ ଜାତୀୟ ଉଦ୍ୟାନରୁ ଶିକାରୀ ଏବଂ କାଠ ମାଫିଆଙ୍କୁ ଗିରଫ କରିଛି ବନବିଭାଗ । ଗତକାଲି ପେଟ୍ରୋଲିଂ ସମୟରେ ଶିମିଳିପାଳ ଉତ୍ତର ବନ୍ୟପ୍ରାଣୀ ବନଖଣ୍ଡ ଚହଲା ରେଞ୍ଜ ଅଞ୍ଚଳରୁ ୩ ଜଣ କାଠ ମାଫିଆ ଓ ଗୁରୁଗୁଡ଼ିଆ ରେଞ୍ଜ ଅଞ୍ଚଳରୁ ୩ ଜଣ ଶିକାରୀଙ୍କୁ ଧରିଛି ବନବିଭାଗ । କାଠ ମାଫିଆଙ୍କ ଠାରୁ ୨ଟି ଚିରାଯାଇଥିବା ପିଆଶାଳ ଗଣ୍ଡି, ଗୋଟିଏ କରତ ଓ ଧନୁତୀର ସମେତ ଗୋଟିଏ କୁରାଢ଼ୀ ଜବତ କରିଥିବା ବେଳେ ଶିକାରୀ ମାନଙ୍କ ପାଖରୁ ୭କେଜି କୁଟୁରା ମାଂସ, ଧନୁତୀର, ଗୋଟିଏ କୁରାଢ଼ୀ ଓ ପନିକି ଜବତ କରିଛି ବନବିଭାଗ ।
ଶିକାରୀମାନେ ଯଶୀପୁର ଥାନା ଉତ୍ତରାସ ଗ୍ରାମର ବୁଧୁ ସିଂ, ବାଘରାୟ ହୋ ଏବଂ ବୁଧୁରାମ ହୋ ହୋଇଥିବା ବେଳେ କାଠ ମାଫିଆମାନେ ବିଶୋଇ ଥାନା କେସମ ଗାଁର କେନ୍ଦୀଆ ନାୟକ, ମାନ ନାୟକ ଓ ଦୁର୍ଗା ନାୟକ ବୋଲି ଜଣାପଡିଛି । ବନବିଭାଗ ସେମାନଙ୍କୁ ଗିରଫ କରି ଯଶୀପୁର ସ୍ଥିତ ଉତ୍ତର ବନଖଣ୍ଡ କାର୍ଯ୍ୟାଳୟକୁ ଆଣିଛି । ଆଜି ସମସ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ବନବିଭାଗ ପକ୍ଷରୁ ସୂଚନା ମିଳିଛି ।
