ଚିତ୍ରଦୁର୍ଗ ୧୨/୮: କର୍ଣ୍ଣାଟକର ଚିତ୍ରଦୁର୍ଗ ଜିଲ୍ଲାରେ ବୁଧବାର ସକାଳେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ବିଜୟପୁରାରୁ ବେଙ୍ଗାଲୁରୁ ଯାଉଥିବା ଘରୋଇ ବସରେ ନିଆଁ ଲାଗିଯିବା କାରଣରୁ ୫ଜଣ ଜୀବନ୍ତ ଜଳି ଯାଇଛନ୍ତି। ଏହି ଘଟଣା ଚିତ୍ରଦୁର୍ଗ ଜିଲ୍ଲାର ଜାତୀୟ ରାଜପଥରେ ଘଟିଛି।
ସୂଚନା ଅନୁଯାୟୀ ବସରେ ୩୨ଜଣ ଯାତ୍ରୀ ଥିଲେ ଏବଂ ୪ନମ୍ବର ଜାତୀୟ ରାଜପଥର କେଆର ହଲ୍ଲି ନିକଟରେ ନିଆଁ ଲାଗିଥିଲା। ମୃତକଙ୍କ ମଧ୍ୟରେ ୨ଜଣ ଶିଶୁଙ୍କ ସହ ଜଣେ ମହିଳା ରହିଛନ୍ତି।
କୁହାଯାଉଛି ଯେ ବସର ଇଞ୍ଜିନରେ କୌଣସି ତ୍ରୃଟି ଥିବାରୁ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣା ପରେ ଘଟଣାସ୍ଥଳରେ ଏସପି ପହଞ୍ଚିଥିଲେ। ଗୁରୁତରଙ୍କୁ ନିକଟସ୍ଥ ଜିଲ୍ଲା ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି। ପୋଲିସ୍ ମାମଲା ରୁଜୁ କରି ପରବର୍ତ୍ତୀ ଯାଞ୍ଚ ଆରମ୍ଭ କରି ଦେଇଛି।
