ପାଟଣା, ୧୦/୦୩: ରାଜ୍ୟର ବିଭିନ୍ନ ଜିଲ୍ଲାର ଜଙ୍ଗଲରେ ଏବେ ନିଆଁର ଭୟାବହତା ଦେଖିବାକୁ ମିଳିଛି । ବିନ ବିଭାଗ ନିଆଁକୁ ଆୟତ୍ତକୁ ଆଣିବାକୁ ପ୍ରୟାସ କରୁଥିଲେ ମଧ୍ୟ ସଫଳ ହେଉନାହିଁ । ନିଆଁ ଏତେ ମାତ୍ରାରେ ବ୍ୟାପି ଗଲାଣି ଯେ, ରାସ୍ତା ଉପରକୁ ମଧ୍ୟ ମାଡ଼ି ଆସିଲାଣି ।
ଏହିପରି ଏକ ଘଟଣା କେନ୍ଦୁଝର ଜିଲ୍ଲାରେ ଦେଖିବାକୁ ମିଳିଛି । ପାଟଣା ରେଞ୍ଜ ଅନ୍ତର୍ଗତ ଧନୁର୍ଜୟପୁର ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥ କଡ଼ରେ ଲଗା ଯାଇଥିବା ଶହଶହ ଗଛ ନିଆଁ ଲାଗି ଜଳି ପୋଡି ପାଉଁଶ ହୋଇଯାଇଛି ।
ଖବର ପାଇ ଘଟଣାସ୍ଥଳରେ ପାଟଣା ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ ସୁଦ୍ଧା ସେତେ ବେଳକୁ ଗଛଗୁଡ଼ିକ ସମ୍ପୂର୍ଣ୍ଣ ପୋଡି ନଷ୍ଟ ହୋଇ ଯାଇଥିଲା । ୪୯ ନମ୍ବର ରାଜପଥର ସମ୍ପ୍ରସାରଣ ବେଳେ ରାଜପଥ କଡ଼ରେ ଥିବା ଅନେକ ଗଛ କଟା ଯାଇଥିଲା । ପରେ ରାସ୍ତା କଡରେ ନୂତନ ଗଛ ସୃଷ୍ଟି କରାଯିବା ଉଦ୍ଦେଶ୍ୟରେ ଓଏଫଡିସି ପକ୍ଷରୁ ଏଠାରେ ଗଛ ଲଗା ଯାଇଥିଲା । ତେବେ ନିଆଁ କାହିଁକି ଲାଗିଲା ଏହାର ପ୍ରକୃତ କାରଣ ଜଣା ପଡିନାହିଁ ।