ଦେଓଗଡ, ୧୦|୦୯: ରେଙ୍ଗାଳୀ ନଦୀବନ୍ଧ ଦ୍ଵାରା ବାସଚ୍ୟୁତ ପରିବାରକୁ ଜମି ପଟ୍ଟା ପ୍ରଦାନ ଦାବି । ଜିଲ୍ଲା ପ୍ରଶାସନର ଦ୍ବାରସ୍ଥ ହେଲେ ଗ୍ରାମବାସୀ ।
ସୂଚନାନୁସାରେ, ଅଶୀ ଦଶକରେ ରେଙ୍ଗାଳୀ ନଦୀବନ୍ଧ ଯୋଜନା ଦ୍ବାରା ଦେବଗଡ ଜିଲ୍ଲାର ଅନେକ ଗ୍ରାମର ଲୋକେ ବାସଚ୍ୟୁତ ହୋଇଥିଲେ । ଏହି ଯୋଜନା ପାଇଁ ବାଲିରଇ, ନନେହିଁ, ଜାମଝରୀ, ଗୋଡଭଙ୍ଗା ଗ୍ରାମର ବାସଚ୍ୟୁତ ପରିବାରକୁ ଲୁଢର ଗ୍ରାମର ଉଦୟପୁର ଅଞ୍ଚଳରେ ଥଇଥାନ କରାଯାଇଥିଲା । ସେହି ସମୟରେ ଗ୍ରାମବାସୀଙ୍କୁ "କେ" ଫର୍ମ ପଟ୍ଟା ଦିଆଯାଇଥିଲା ।
ମାତ୍ର ଇତିମଧ୍ୟରେ ଚାଳିଶି ବର୍ଷ ବିତିଯାଇଥିଲେ ମଧ୍ୟ ଗ୍ରାମବାସୀଙ୍କୁ ଫାଇନାଲ ପଟ୍ଟା ଦିଆଯାଇନାହିଁ । ଫଳରେ ଗ୍ରାମବାସୀମାନେ ବନ୍ୟା, ବାତ୍ୟା, ମରୁଡି ସମୟରେ ସରକାରୀ ସହାୟତା ପାଇପାରୁନାହାନ୍ତି । ସେହିଭଳି ଗ୍ରାମବାସୀ ଶିକ୍ଷା, ସ୍ବାସ୍ଥ୍ୟ, ଗମନାଗମନ, ପାନୀୟ ଜଳ ଭଳି ମୌଳିକ ସୁବିଧାରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି । ଏନେଇ ଗ୍ରାମବାସୀମାନେ ଦେବଗଡ ଉପଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରିବା ସହ ଶୀଘ୍ର ଫାଇନାଲ ପଟ୍ଟା ଦେବାକୁ ଦାବି କରିଛନ୍ତି।