କଳାହାଣ୍ଡି ୧୬।୪: ସରକାରଙ୍କ ନୂଆ ଧାନ ସଂଗ୍ରହ ନୀତି ଅନୁଯାୟୀ ରବି ଋତୁ ମଣ୍ଡିରେ ଧାନ ବିକ୍ରିରୁ ବାଦ ପଡିବେ ହଜାର ହଜାର ଚାଷୀ । ଆଟ, ମାଳ ମାମୁଲି ତଥା ବେର୍ଣା କିସମର ଚାଷ ଜମିକୁ ଅଣ ଜଳସେଚିତ ଦର୍ଶାଇ ସରକାର ପଞ୍ଜୀକରଣରେ ସାମିଲ କରୁ ନଥିବାରୁ କଳାହାଣ୍ଡି ଜିଲ୍ଲାର ଶହ ଶହ ଚାଷୀ ଧାନ ବିକ୍ରି ପାଇଁ ଚିନ୍ତାରେ ଅଛନ୍ତି ।
ସରକାରଙ୍କ ରବି ଋତୁ ଧାନ ମଣ୍ଡିରେ ଧାନ ବିକ୍ରି ପାଇଁ ଚାଷୀ ପଞ୍ଜୀକରଣ ଶେଷ ହୋଇଯାଇଛି । ହେଲେ ସରକାରଙ୍କ ନୂଆ ନୀତି ଆନୁଯାୟୀ ଆଟ, ମାଳ, ମାମୁଲି ତଥା ବେର୍ଣା କିସମର ଚାଷ ଜମିକୁ ଅଣ ଜଳସେଚିତ ଦର୍ଶାଇ ସରକାର ବାଦ ଦେଇଛନ୍ତି । ଯେତେବେଳେ କି ଇନ୍ଦ୍ରାବତୀ ଜଳ ପ୍ରକଳ୍ପ ଜଳସେଚନ ତଥା ଉଠା ଜଳସେଚନ ଦ୍ବାରା ଏହି ଚାଷ ଜମିରେ ଦୋଫସଲି ଚାଷ ହେଉଛି । ତଥା ସରକାର ଗତ ୧୯୮୦ ମସିହା ପରେ ବନ୍ଦୋବସ୍ତ କରି ନ ଥିବାରୁ ଜମିର କିସମ ବଦଳି ନାହିଁ । ଫଳରେ ଧାନ ଚାଷ ସତ୍ତ୍ବେ ଧାନ ବିକ୍ରି ପାଇଁ ଚାଷୀ ବାଦ୍ ପଡିବେ । ଏଣୁ ସରକାର ଏହି ଆଇନରେ ସଂଶୋଧନ ପାଇଁ ଚାଷୀ ଜିଲ୍ଲାର ବିଭିନ୍ନ ତହସିଲଦାରମାନଙ୍କୁ ଦାବି ପତ୍ର ପ୍ରଦାନ କରିଛନ୍ତି ।
ଆଇନ ସଂଶୋଧନ ସରକାର କରିପାରିବେ ଏଣୁ ଜିଲ୍ଲା ଅଧିକାରୀ ହାତରେ କୌଣସି କ୍ଷମତା ନାହିଁ । ଏଣୁ ସରକାର ଏହାର ପୁନଃ ବିଚାର ଆବଶ୍ୟକତା ରହିଛି । ନଚେତ କରୋନା କାଳରେ ରବି ଧାନ ଚାଷୀଙ୍କ ଏକ ମାତ୍ର ରୋଜଗାର ମାଧ୍ୟମ ଧାନ ଉତ୍ପାଦନ ପରେ ବିକ୍ରି ଚିନ୍ତାର କାରଣ ପାଲଟିବ ।
