ନୂଆଦିଲ୍ଲୀ ୨୫/୦୧: ଟ୍ରାକ୍ଟର ରାଲି ପରେ ପାର୍ଲାମେଣ୍ଟ ଚଲୋ ଡାକରା ଦେଲେ କୃଷକ। ଜାନୁଆରୀ ୨୬ ସାଧାରଣତନ୍ତ୍ର ଦିବସ ଦିନ ଚାଷୀଙ୍କୁ ଟ୍ରାକ୍ଟର ରାଲି ପାଇଁ ଅନୁମତି ମିଳିଛି। ଏନେଇ ହଜାର ହଜାର ଚାଷୀ ପ୍ରସ୍ତୁତ ବି ଅଛନ୍ତି। ଏହା ପରେ ପୁଣି ଫେବୃଆରୀ ୧ ଦିନ ସଂସଦ ବଭବ ଅଭିମୁଖେ ପାଦରେ ଚାଲି ଚାଲି ନୂଆ କୃଷି ଆଇନ୍‌ ବିରୋଧରେ ବିଦ୍ରୋହ କରିବେ ବୋଲି କୃଷକ ସଂଗଠନ ଘୋଷଣା କରିଛନ୍ତି ।

ବଜେଟ୍‌ ଉପସ୍ଥାପନ ଦିନ ଅର୍ଥାତ ଫେବୃଆରୀ ୧ରେ ବିଭିନ୍ନ ସ୍ଥାନରୁ ବହୁ ସଂଖ୍ୟକ ଚା​‌ଷୀ ସଂସଦ ଅଭିମୁଖେ ଯାତ୍ରା କରିବେ। ଏନେଇ କ୍ରାନ୍ତିକାରୀ କିଷାନ ସଂଗଠନ ନେତା ଦର୍ଶନ ପାଲ ସୋମବାର ଦିନ ସୂଚନା ଦେଇଛନ୍ତି। କୃଷକ ନେତା ଦର୍ଶନ ପାଲ କହିଛନ୍ତି, ‘କୃଷକ, ବଜେଟ୍‌ ଉପସ୍ଥାପନ ଦିନ ୧ ଫେବୃଆରୀରେ ବିଭିନ୍ନ ସ୍ଥାନରୁ ସଂସଦ ଅଭିମୁଖେ ଯାତ୍ରା କରିବେ।’

ହଜାର ହଜାର କୃଷକ ଜାନୁଆରୀ ୨୬ରେ ଟ୍ରାକ୍ଟର ରାଲି କରିବାକୁ ଯାଉଥିବା ବେଳେ ଏହା ପୂର୍ବରୁ ଦର୍ଶନ ପାଲଙ୍କ ବୟାନ ସାମ୍ନାକୁ ଆସିଛି। କେନ୍ଦ୍ରର ନୂଆ କୃଷି ଆଇନ୍‌ ବିରୋଧରେ ୨ ମାସ ହେଲା ଆନ୍ଦୋଳନ କରୁଛନ୍ତି ଚାଷୀ। ଏହାରି ମଧ୍ୟରେ ୧୧ ଥର କୃଷି –ସରକାର ଆଲେଚନା ହୋଇଥିଲେ ବି କୌଣସି ନିଷ୍କର୍ଷ ବାହାରିପାରି ନାହିଁ।