ମେରଠ ୨୯/୧- ଦୁଇଜଣ ଝିଅ ଲିଭ ଇନରେ ରହିବାକୁ ନେଇ ପରିବାରର ବିରୋଧ ପରେ ହାଇକୋର୍ଟରେ ହୋଇଛନ୍ତି ଦ୍ଵାରସ୍ଥ । ସାରାଜୀବନ ସାଙ୍ଗରେ ରହିବାକୁ ହାଇକୋର୍ଟକୁ କରିଛନ୍ତି ନିବେଦନ ।
ଏହିଭଳି ଘଟଣା ଘଟିଛି ମେରଠରେ । ଦୁଇଜଣ ହଷ୍ଟେଲରେ ରହିବା ସମୟରୁ ହୋଇଥିଲା ସଂପର୍କ । ଜ୍ୟୋତି ଓ ଗିନ୍ନି ଦୁଇଜଣ ସାଙ୍ଗ ହୋଇ ଏକା କଲେଜରେ ପଢ଼ୁଥିଲେ । ସେମାନେ ଦୁହେଁ ବି ଥିଲେ ରୁମମେଟ । ସେହି ସମୟରୁ ସେମାନେ ସମଲିଙ୍ଗୀ ସଂପର୍କରେ ଥିଲେ । ପାଠ ପଢ଼ାସରିବା ପରେ ସେମାନେ ବିଭିନ୍ନ ପ୍ରତିଯୋଗିତା ମୂଳକ ପରୀକ୍ଷା ପାଇଁ ମଧ୍ୟ ବାହାରେ ରହୁଥିଲେ । ସେମାନେ ୨୦୧୩ ମସିହାରୁ ସାଙ୍ଗରେ ରହିଆସିଥିଲେ ବି ପରିବାର ଲୋକ ବିରୋଧ କରୁଥିଲେ । ଏହି ବିରୋଧରେ ସମ୍ମୁଖୀନ ହେଲେ ମଧ୍ୟ ସେମାନେ କେହି କାହାକୁ ଛାଡ଼ିବାକୁ ରାଜି ନଥିଲେ ।
ଏହି ଘଟଣାକୁ ଜ୍ୟୋତିର ପରିବାର ଲୋକ ବେଶୀ ବିରୋଧ କରୁଥିଲେ । ଏହାଦ୍ଵାରା ପରିବାର ଲୋକଙ୍କର ମାନହାନି ହୋଇଯିବା କାରଣରୁ କେହି ରାଜି ନଥିଲେ । ସାମାଜିକ ବାସନ୍ଦ ହେବାର ମଧ୍ୟ ପରିବାର ଲୋକଙ୍କର ଭୟ ଥିଲା ।
କିନ୍ତୁ ଏହି ଭଲପାଇବାକୁ ନେଇ ଦୁଇ ପ୍ରେମୀ ଥିଲେ ବେଶୀ ସିରିୟସ । ପରିବାର ଲୋକଙ୍କ ବିରୋଧକୁ ସାମନା କରି ନପାରି ହାଇକୋର୍ଟରେ ହେଲେ ଦ୍ଵାରସ୍ଥ ।
ଆହ୍ଲାହାବାଦ ହାଇକୋର୍ଟର ପରବର୍ତ୍ତୀ ଶୁଣାଣିକୁ ଅପେକ୍ଷା କରି ରହିଛନ୍ତି ପ୍ରେମୀଯୁଗଳ ।
