ଥିରୁବନ୍ତପୂରମ,୦୫/୦୧: ବିଜ୍ଞାପନରେ ମିଥ୍ୟା ପ୍ରତିଶ୍ରୁତି ଦେଉଥିବା ଅଭିଯୋଗରେ କେରଳ କନଜ୍ୟୁମର କୋର୍ଟ ବା ଖାଉଟି ଅଦାଲତ ଜଣେ ଅଭିନେତାଙ୍କୁ ଜରିମାନା କରିଛି । କାରଣ ଏହି ଅଭିନେତାଜଣଙ୍କ ଚୁଟି ଉଠିବା ନେଇ ଏକ ବିଜ୍ଞାପନ କରିଥିଲେ । ସେ ଏହାର ବ୍ରାଣ୍ଡ୍ ଆମ୍ବାସାଡର ମଧ୍ୟ ଥିଲେ । କିନ୍ତୁ ଏହି ବିଜ୍ଞାପନର ପ୍ରତିଶ୍ରୁତି ଜଣେ ବ୍ୟକ୍ତିଙ୍କଠାରେ ଭୁଲ ପ୍ରମାଣିତ ହୋଇଥିଲା । ଫଳରେ ସେ ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ ।
ଥ୍ରୀସୁରର ଜିଲ୍ଲା ଖାଉଟି ରିଡ୍ରେସାଲ୍ ଫୋରମ୍ ଧାତ୍ରୀ ହେୟାର କ୍ରିମ୍ ଓ ଅଭିନେତା ଅନୁପ ମେନନଙ୍କୁ ୧୦ ହଜାର ଟଙ୍କା ଲେଖାଏଁ କ୍ଷତିପୂରଣ ପାଇଁ ନିର୍ଦ୍ଦେଶ ଦେଇଛି ।
ସୂଚନାନୁସାରେ, ଫ୍ରାନସିସ୍ ନାମକ ଜଣେ ବ୍ୟକ୍ତି ବିଜ୍ଞାପନକୁ ନେଇ ଧାତ୍ରୀ ଆୟୁର୍ବେଦ ପ୍ରାଇଭେଟ୍ ଲିମିଟେଡ୍ ଓ ଅଭିନେତା ଅନୁପଙ୍କ ବିରୋଧରେ ଅଭିଯୋଗ କରିଥିଲେ । ସେ ଅଭିଯୋଗ କରିଥିଲେ ଯେ, ୨୦୧୨ରେ ସେ ୩୭୬ ଟଙ୍କାରେ ବିଜ୍ଞାପନରେ ପ୍ରଦତ୍ତ ତେଲ କିଣିଥିଲେ । ୬ ସପ୍ତାହରେ ଚୁଟି ଉଠିବା ନେଇ ବିଜ୍ଞାପନରେ କୁହାଯାଇଥିଲା । ଏହାର ପ୍ରୟୋଗ ପରେ ବି ତାଙ୍କଠାରେ କିଛି ଫଳପ୍ରଦ ହୋଇନଥିଲା ।ବାଧ୍ୟହୋଇ ସେ ଖାଉଟି ଅଦାଲତରେ କମ୍ପାନୀ ବିରୋଧରେ ୫ ଲକ୍ଷ ଟଙ୍କାର କ୍ଷତିପୂରଣ ଦାବି କରିଥିଲେ ।
ତେବେ ଅନୁପ ମେନନ କହିଛନ୍ତି ଯେ, ସେ କେବେବି ବିଜ୍ଞାପନରେ ଥିବା ସାମଗ୍ରୀ ବ୍ୟବହାର କରିନାହାଁନ୍ତି । ତାଙ୍କ ମାଆ ହାତରେ ଯେଉଁ ତୈଳ ପ୍ରସ୍ତୁତ କରନ୍ତି ସେ ତାକୁ ହିଁ କେବଳ ବ୍ୟବହାର କରିଥାନ୍ତି । ଖାଉଟି ଅଦାଲତ ମଧ୍ୟ ଘଟଣାରୁ ସଠିକ୍ ବାବେ ପରଖିଥିଲେ । ବିଜ୍ଞାପନରେ ଦିଆଯାଇଥିବା ସାମଗ୍ରୀ ସାମାନ୍ୟ ବି ଫଳପ୍ରଦ ନଥିବା ସ୍ପଷ୍ଟ ହୋଇଥିଲା । ଏପରି ମିଛ ବିଜ୍ଞାପନ ଜାଲରେ ନ ପଡିବା ପାଇଁ କୋର୍ଟ ଖାଉଟିଙ୍କୁ ପରାମର୍ଶ ଦେଇଛନ୍ତି । ସେହିପରି ଖବର କାଗଜ ଓ ଟିଭି ମଧ୍ୟ ବିଜ୍ଞାପନର ସତ୍ୟତା ଜାଣି ପ୍ରସାରଣ କରିବାକୁ ତାଗିଦ କରିଛନ୍ତି ।
