ନୀଳଗିରି ୧୦।୧୦: ନୀଳଗିରି ଅବକାରୀ ବିଭାଗ ପକ୍ଷରୁ ଦୁଇଟି ଚୋରା ମଦ ଭାଟି ଉପରେ ଚଢ଼ାଉ କରାଯାଇଛି । ବିପୁଳ ପରିମାଣରେ ମହୁଲ ପୋଚ ଓ ମଦ ରନ୍ଧା ସାମଗ୍ରୀ ଜବତ କରିଛି ଅବକାରୀ ବିଭାଗ । ନୀଳଗିରି ଆଦିବାସୀ ବହୁଳ ଅଂଚଳରେ ଦିନକୁ ଦିନ ଚୋରା ମଦ କାରବାର ବଢି ଚାଲିଥିବା ବେଳେ ଅଞ୍ଚଳବାସୀ ଅତିଷ୍ଠ ହୋଇଗଲେଣି । ମଦ ମାଫିଆମାନେ ଜଙ୍ଗଲ, ପାହାଡ ମୂଳରେ ଚୋରା ମଦ ଭାଟି କରି ଲକ୍ଷ ଲକ୍ଷ ଟଙ୍କାର ଦେଶୀ ମଦ ବିଭିନ୍ନ ଅଞ୍ଚଳକୁ ଚାଲାଣ କରୁଛନ୍ତି ।
ଶୁକ୍ରବାର ନୀଳଗିରି ଅବକାରୀ ଓଆଇସି ଲକ୍ଷସାଧବ ପ୍ରଧାନଙ୍କ ନେତୃତ୍ବରେ ଏକ ଟିମ୍ ବରମପୁର ଥାନା ଅଧିନ ମହୁଲବଣି ଅଂଚଳରେ ଦୁଇଟି ଚୋରା ମଦ ଭାଟି ଉପରେ ଅଚାନକ ଚଢ଼ାଉ କରିଥିଲେ । ୨୬୪୦ କେଜି ପୋଚ ଜବତ କରିବା ସହ ବିପୁଳ ପରିମାଣରେ ମଦ ରନ୍ଧା ସାମଗ୍ରୀ ଜବତ କରିଛନ୍ତି । ତେବେ ମଦ ଭାଟି ମାଲିକଙ୍କୁ ଗିରଫ କରିବାରେ ବିଫଳ ହୋଇ ଫେରିଛନ୍ତି । ଏନେଇ ପୃଥକ ପୃଥକ ମାମଲା ରୁଜୁ କରିଥିବା ଜଣାପଡିଛି ।