ପୁରୀ ୨୮।୮: ଶ୍ରୀମନ୍ଦିର ଚାରିପଟୁ ୭୫ ମିଟର ଉଚ୍ଛେଦ ପ୍ରକ୍ରିୟା ଜାରି । ଆଜି ମାଟିରେ ମିଶିବ ଏମାର ମଠ । ମଠର ପ୍ରଥମ ମହଲାରେ ଥିବା ରଘୁନନ୍ଦନ ପାଠାଗାରକୁ ସ୍ଥାନାନ୍ତର କରାଯିବ । ସେହିପରି ବଡ ଆଖଡା ମଠ ଉପରେ ବୁଲିବ ବୁଲଡୋଜର ।
ସେହିପରି ଶ୍ରୀମନ୍ଦିର ସମ୍ମୁଖରେ ଥିବା ଅସୁରକ୍ଷିତ କୋଠା ଭଙ୍ଗାଯିବ । ଆଇନଶୃଙ୍ଖଳା ଉପରେ ନଜର ରଖିବା ପାଇଁ ୮ ଜଣ ମାଜିଷ୍ଟ୍ରେଟ୍, ରାପିଡ୍ ଆକ୍ସନ ଫୋର୍ସ ସମେତ ୩୦ ପ୍ଲାଟୁନ୍ ପୁଲିସ ଫୋର୍ସ ମୁତୟନ ଅଛନ୍ତି । ଗତକାଲି ଶତାଧିକ ବର୍ଷର ପୁରୁଣା ଲଙ୍ଗୁଳି ମଠ ଧୂଳିସାତ ହୋଇଯାଇଛି । କେବଳ ମଠ ଭିତରେ ଥିବା ଛୋଟିଆ ମନ୍ଦିରକୁ ଭଙ୍ଗାଯାଇନି ।
ଗତ ସପ୍ତାହରେ ମେଘନାଦ ପାଚେରିକୁ ଲାଗି ଅବରୋଧ ମୁକ୍ତ ଓ ସିପସରୁବାଲି ଅଞ୍ଚଳରେ ଜବରଦଖଲ ଉଚ୍ଛେଦ ହୋଇଥିଲା । ପୁରୀ ସହରର ଚିତ୍ର ସଂପୂର୍ଣ୍ଣ ବଦଳାଇବା ଲାଗି ରାଜ୍ୟ ସରକାର ଅଣ୍ଟା ଭିଡିଛନ୍ତି ।
