Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଆରମ୍ଭ ହେଲା ବର୍ଷ ବର୍ଷ ଧରି ଶ୍ରୀମନ୍ଦିର ସଂସ୍କୃତି ସହ ଯୋଡ଼ି ହୋଇରହିଥିବା ଏମଆର ମଠ ଉଚ୍ଛେଦ ପ୍ରକ୍ରିୟା, ଶ୍ରୀମନ୍ଦିରର ଇତିହାସ ଯେତିକି ପୁରୁଣା, ଏମାର ମଠର ଇତିହାସ ମଧ୍ୟ ସେତିକି ପ୍ରାଚୀନ

28/08/2019 at 6:26 PM

ପୁରୀ୨୮|୮: ପୁରୀରେ ଲଙ୍ଗୁଳି ମଠ ଉଚ୍ଛେଦ ପରେ ଏବେ ପଡ଼ିଛି  ଏମାର ମଠର ପାଳି |  ଇତିହାସର ଅନେକ ପୃଷ୍ଠାକୁ ନିଜ ସ୍ମୃତିର ଆଇନାରେ ସାଇତି ଥିବା ଏହି ମଠ ଏବେ ନିଜେ ଇତିହାସର ଗର୍ଭକୁ ଚାଲିଯିବ  । ବର୍ଷ ବର୍ଷ ଧରି ଶ୍ରୀମନ୍ଦିର  ସଂସ୍କୃତି ସହ ଯୋଡ଼ି ହୋଇରହିଥିବା ଏହି ମଠକୁ ଏବେ ଶ୍ରୀମନ୍ଦିରର ସୁରକ୍ଷା ପାଇଁ  ସିଂହଦ୍ବାରା ସାମ୍ନାରୁ ହଟିବାକୁ ହେବ । ପ୍ରଶାସନର ନୋଟିସ ପରେ ଏବେ ମଠ ଖାଲି କରିବାରେ ଲାଗିଛନ୍ତି ମଠ କର୍ମଚାରୀମାନେ । …..

ଶ୍ରୀମନ୍ଦିରର ସୁରକ୍ଷା ପାଇଁ ଏହାର ୭୫ମିଟର ପରିଧି ଭିତରେ ଥିବା ସମସ୍ତ ନିର୍ମାଣକୁ ଉଚ୍ଛେଦ କରାଯାଉଛି । ପ୍ରଥମେ ମେଘନାଦ ପାଚେରୀ ସଂଲଗ୍ନ ନିର୍ମାଣ ଗୁଡ଼ିକୁ ଉଚ୍ଛେଦ ପରେ ସିଂହ ଦ୍ବାର ଠାରୁ ୩୦ମିଟର ଦୂରରେ ଥିବା ଲଙ୍ଗୁଳି ମଠକୁ ଭଙ୍ଗାଯାଇଥିଲା । ଏହା ପରେ ଏମାର ମଠକୁ ଉଚ୍ଛେଦ ପାଇଁ ଚାଲିଛି ପ୍ରଶାସନର ପ୍ରସ୍ତୁତି । ପ୍ରଶାସନଠାରୁ ନୋଟିସ ପାଇବା ପରେ ମଠ ଖାଲି କରୁଛନ୍ତି  ଏହାର କର୍ମଚାରୀ ।

କୁହାଯାଏ, ଶ୍ରୀମନ୍ଦିରର ଇତିହାସ ଯେତିକି ପୁରୁଣା, ଏମାର ମଠର ଇତିହାସ ମଧ ସେତିକି ପ୍ରାଚୀନ । ଏକାଦଶ ଖ୍ରୀଷ୍ଟାବ୍ଦରେ ବିଶିଷ୍ଟ ଧର୍ମଗୁରୁ ରାମାନୁଜ ଯେତେବେଳେ ସାରା ଦେଶରେ ଧର୍ମଯୋଗର ପ୍ରଚାର କରୁଥିଲେ ସେତେବେଳେ ପୁରୀ ଆସି ଏହି ମଠର ପ୍ରତିଷ୍ଠା କରିଥିଲେ । ମହାପ୍ରଭୁଙ୍କ ଚାମର ସେବା, ପଂକ୍ତି ଭୋଗ, ଝୁଲଣ ଯାତ୍ରାରେ ଏମାର ମଠର ଭୂମିକା ଅତ୍ୟନ୍ତ ଗୁରୁତ୍ବପୂର୍ଣ୍ଣ । ତେବେ କିଛି ବର୍ଷ ତଳେ ରୂପା ଇଟାକୁ ନେଇ ସାରା ରାଜ୍ୟରେ ଚର୍ଚ୍ଚାକୁ ଆସିଥିଲା ଏହି ମଠ ।

ଏମାର ମଠକୁ ଉଚ୍ଛେଦ ସହ ଏହାର ଉପର ମହଲାରେ ଥିବା ରଘୁନନ୍ଦନ ପାଠାଗାରକୁ ସ୍ଥାନାନ୍ତର କରାଯିବ । ୧୯୨୧ ମସିହାରେ ଏମାର ମଠର ତତ୍କାଳୀନ ମହନ୍ତ ଗଦାଧର ରାମାନୁଜ ନିଜର ଗୁରୁ ରଘୁନନ୍ଦନ ରାମାନୁଜଙ୍କ ନାମରେ ଏହାର ସ୍ଥାପନା କରିଥିଲେ | ଏହାକୁ ବିଶ୍ବସ୍ତରୀୟ ପାଠାଗାର କରାଯିବା ସହ ବହି ଗୁଡ଼ିକର ଡିଜିଟାଇଜେସନ କରାଯିବ ବୋଲି ସୂଚନା ଦେଇଛନ୍ତି ଜିଲ୍ଲାପାଳ । ଏଥି ସହ କ୍ଷତିଗ୍ରସ୍ତଙ୍କୁ କ୍ଷତିପୂରଣର ଆଶ୍ବାସନାକୁ ପୁଣି ଥରେ ଦୋହରାଇଛି ଜିଲ୍ଲା ପ୍ରଶାସନ  ।

   Related Posts