ଆଠଗଡ଼ ୨୯/୧୦ : ହାତୀ ମୃତକୁ ନେଇ ବର୍ଷ ତମାମ ଚର୍ଚ୍ଚାରେ ଆଠଗଡ଼ ବନ ବିଭାଗ । କେତେବଳେ ଅଜଣା ରୋଗରେ ଆକ୍ରାନ୍ତ ହୋଇ ହାତୀ ମୃତ୍ୟୁ ତ ଆଉ କେତେବେଳେ ଶିକାରୀ ଗୁଳିରେ । ତେବେ ଗତ ବର୍ଷ ୧୦ ବର୍ଷର ଦନ୍ତା ହାତୀ କୁଲାଇଲୋ ବିଟ୍ ହାଉସ୍ ଅଧୀନ ସୁବାସି ସଂରକ୍ଷିତ ଜଙ୍ଗଲରେ ଶିକାରୀ ଗୁଳିରେ ମୃତ୍ୟୁ ହୋଇଥିବା ନେଇ ଆଠଗଡ଼ ଅଞ୍ଚଳରେ ବେଶ ଚର୍ଚ୍ଚା ହୋଇଥିଲା ।
କିନ୍ତୁ ସ୍ଥାନୀୟ ଗଣମାଧ୍ୟମ ମାନଙ୍କ ପାଖରେ ଆବଶ୍ୟକ ପ୍ରମାଣ ନଥିବା ଯୋଗୁ ଖବରଟି ପ୍ରକାଶ ପାଇ ପାରିନଥିଲା । । ଶେଷରେ ଶିକାରୀ ଗୁଳିରେ ମୃତ୍ୟୁ ବରଣ କରିଥିବା ଦନ୍ତାହାତୀର ମୃତ୍ୟୁ ଏବଂ ରାତି ଅଧରେ ତରବରିଆ ଭାବେ ଜଙ୍ଗଲ ମଧ୍ୟରେ ପୋତି ଦେଇଥିବା ଭିଜୁଆଲ ହସ୍ତଗତ ହୋଇଛି । ସବୁଠୁ ଆଶ୍ଚର୍ଯ୍ୟର କଥା ଯେ ଏ ନେଇ ଆଠଗଡ଼ ବନଖଣ୍ଡ ଅଧିକାରୀଙ୍କ ପାଖରେ ଖବର ନାହିଁ ।
ଆଠଗଡ଼ ବନ ବିଭାଗ ଅଧିକାରୀଙ୍କ ଅଜାଣନ୍ତରେ କିପରି ହାତୀକୁ ପୋତି ଦିଆଗଲା ନେଇ ଉଠୁଛି ପ୍ରଶ୍ନ ? ଅନ୍ୟପଟେ ଶିକାର ହୋଇଥିବା ଦନ୍ତା ହାତୀର ଦାନ୍ତ ଗଲା କୁଆଡେ଼ ? ଏନେଇ ବିଭାଗୟ ଅଧିକାରୀ କ୍ୟାମେରା ଆଗରେ ମୁହଁ ଖୋଲିବାକୁ ନାରାଜ । ତେବେ ଆଠଗଡ଼ ରେଞ୍ଜର ଆଈସା ଅଖତର ନିଶା ମୃତ ହାତୀକୁ ପୋତୁ ଥିବା ସମୟରେ ଉପସ୍ଥିତ ଥିବା ଜଣାପଡିଛି ଏହି ଭାଇରାଲ୍ ଭିଡ଼ିଓରୁ ସ୍ପଷ୍ଟ ବାରି ହୋଇ ପଡ଼ୁଛି।