ଭଞ୍ଜନଗର,୧୪/୧୨: ଗଞ୍ଜାମ ଜିଲ୍ଲା ଭଞ୍ଜନଗର ଉତ୍ତର ବନଖଣ୍ଡ ଅଧୀନରେ ଥିବା ରମ୍ଭା ସେକ୍ସନର ବିଭିନ୍ନ ଗ୍ରାମରେ ହାତୀ ପଲଙ୍କ ଆତଙ୍କ ଦେଖିବାକୁ ମିଳିଛି । ଗତ ଏକ ମାସ ଧରି ଗ୍ରାମରେ ହାତୀପଲ ଉପଦ୍ରବ ଚଳାଇଛନ୍ତି ।
ପାଇତା ଗାଁ, ଭାଲୁ ଗୁଡା, ରମ୍ଭା, ଦଦର ଲୁଣ୍ଡା ଆଦି ଜଙ୍ଗଲ ନିକଟ ଗ୍ରାମ ଗୁଡ଼ିକରେ ଦୀର୍ଘ ଏକ ମାସ ଧରି ଚାଲିଛି ହାତୀଙ୍କ ଉପଦ୍ରବ । କେଉଁଠି ହାତୀପଲ ବିଲରେ ଧାନକୁ ଦଳି ଚକଟି ନଷ୍ଟ କରିଛନ୍ତି ତ କେଉଁଠି ଖଳାରେ ପଶି ଧାନ ଖାଉଛନ୍ତି। ବନବିଭାଗ କର୍ମଚାରୀଙ୍କୁ ଖବର ଦେଲେ ମଧ୍ୟ କେହି ଆସୁନାହାନ୍ତି। ଫଳରେ ଗାଁ ଲୋକେ ନିଜ ଉପାୟରେ ହାତୀକୁ ଘଉଡାଇବାକୁ ବାଧ୍ୟ ହେଉଛନ୍ତି ।
ହାତୀଙ୍କୁ ଡରି ଚାଷୀ ମାନେ ଧାନ ଫସଲ ଶୀଘ୍ର କାଟି ଘର ପାଖ ଖଳାରେ ରଖିଥିଲେ । କିନ୍ତୁ ଏବେ ହାତୀପଲ ଖଳାରେ ପସି ଧାନ ଖାଇ ପକାଉଛନ୍ତି । ଏନେଇ ଉତ୍ତର ଘୁମୁସର ବନଖଣ୍ଡ ଡିଏଫଓଙ୍କୁ ପଚାରିବାରୁ ସେ ଅଭିଯୋଗ ଆସିଲେ ପଦକ୍ଷେପ ନେବେ ବୋଲି କହିଛନ୍ତି ।
