ନୂଆପଡା ୩୧।୦୧: ଭୋଜି ଖାଇ ଫେରୁଥିବା ସମୟରେ ହାତୀ ଆକ୍ରମଣରେ ଜଣେ ମୃତ । ନୂଆପଡା ଜିଲ୍ଲା ଖଡିଆଳ ରେଞ୍ଜ ଅଞ୍ଚଳର ଘଟଣା । ମୃତକ ଦରଗାଁର ବିଷ୍ଣୁ ଦଳ ବୋଲି ଜଣାପଡିଛି । ଖବରପାଇ ଘଟଣାସ୍ଥଳରେ ବନ ବିଭାଗ ପହଞ୍ଚ ମୃତଦେହକୁ ଜବତ କରିଛି ।
ସୂଚନାଯୋଗ୍ୟ ଯେ, ନୂଆପଡା ଜିଲ୍ଲା ଖଡିଆଳ ରେଞ୍ଜ ଦରଗାଁର ବିଷ୍ଣୁ ଦଳ ରାତିରେ ଏକ ବିବାହ ଭୋଜି ଖାଇ ବାଇକ ଯୋଗେ ତିନିଜଣ ଘରକୁ ଫେରୁଥିଲେ । ରାସ୍ତାରେ ବାଇକ ସାମ୍ନାକୁ ଏକ ହାତୀ ସାମନାକୁ ଆସିଯାଇଥିଲା । ହାତୀକୁ ଦେଖି ତିନିଜଣ ଦୌଡିଯିବାକୁ ଉଦ୍ୟମ କରିଥିବା ବେଳେ ବିଷ୍ଣୁ ଯାଇପାରିନଥିଲା , ପରେ ହାତୀଟି ବିଷ୍ଣୁଙ୍କୁ ହାତୀ କଚାଡି ଦେଇଥିଲା ।ବାଇକରେ ଥିବା ଅନ୍ୟ ଦୁଇ ଜଣ ସାମାନ୍ୟ ଆହତ ହୋଇଥିବା ସୁଚନା ମିଳିଛି ।
ଖବର ପାଇ ସ୍ଥାନୀୟଲୋକେ ପହଞ୍ଚିଥିଲେ । କିନ୍ତୁ ଗାଡି ଅଭାବରୁ ଡାକ୍ତରଖାନା ନେଇ ପାରି ନଥିଲେ । ଯାହା ଫଳରେ ଗୁରୁତର ଆହତ ବିଷ୍ଣୁଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବାର ସୁଚନା ମିଳିଛି । ସେହିପରି ଗୁରୁବାର ଦିନ ବାଟବଣା ହୋଇ ଗୋଟିଏ ଦନ୍ତା ହାତୀ ତିଖାଲି ନଦୀ ଭିତରେ ଦୀର୍ଘ ସମୟ ଧରି ଫସି ରହିଥିଲା । ବାହାରିବା ପରେ ସ୍ଥାନୀୟ ତିଖାଲି ଉଦ୍ୟାନ ଠାରେ ଏକ ଗାଡି ଭାଙ୍ଗିଥିବା ବେଳେ ଜଗୁଆଳିମାନେ ଅଳ୍ପକେ ବର୍ତ୍ତି ଯାଇଥିଲେ । ବନ ବିଭାଗ ଘଟଣାସ୍ଥଳରେ ପହଞ୍ଚିଥିଲେ ମଧ୍ୟ ହାତୀଟି ଜଙ୍ଗଲ ମଧ୍ୟରେ ଥିବାରୁ ଘଉଡାଇବା ପାଇଁ ସକ୍ଷମ ହୋଇ ପାରିନଥିଲା । ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛି ବନ ବିଭାଗ । ମୃତକ ପରିବାରକୁ ସରକାରୀ ସହାୟତା ଦେବା ପାଇଁ ପରିବାର ସହିତ ଆଲୋଚନା କରୁଛନ୍ତି ବନ ବିଭାଗ ।
