ଢେଙ୍କାନାଳ ୦୧/୦୧: ହାତୀ ଆକ୍ରମଣରେ ମହିଳାଙ୍କ ସମେତ ୩ ଜଣ ଗୁରୁତର ହୋଇଛନ୍ତି। ଢ଼େଙ୍କାନାଳ ଜିଲ୍ଲାର ପୃଥକ ପୃଥକ ସ୍ଥାନରେ ହାତୀ ଆକ୍ରମଣର ଖବର ସାମ୍ନାକୁ ଆସିଛି। ତେବେ ଗୁରୁତରମାନଙ୍କୁ ଚିକିତ୍ସା ପାଇଁ ଢେଙ୍କାନାଲ ମୁଖ୍ୟ ଡାକ୍ତର ଖାନାରେ ଭର୍ତ୍ତି କରାଯାଇଛି ।
ସୂଚନା ମୁତାବକ, ଢେଙ୍କାନାଳ ସଦର ବନାଞ୍ଚଳର ଜୋରନ୍ଦା ମହାପଦାରୁ ଶୁଖୁଆ ବିକ୍ରି ସାରି ନିଜ ଗାଁ କାଲୁରିଆକୁ ଫେରୁଥିବା ବେଳେ ଜଣେ ମହିଳାଙ୍କୁ ହାତୀ କଚାଡି ଦେବାରୁ ସେ ଗୁରୁତର ହୋଇଛନ୍ତି । ଗୁରୁତର ଅବସ୍ଥାରେ ମହିଳାଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନରେ ଭର୍ତ୍ତି କରାଯାଇଛି । ଗୁରୁତର ମହିଳା ଜଣଙ୍କ କାଲୁରିଆ ଗ୍ରାମର କୁମୁଦିନି ବେହେରା ବୋଲି ଜଣାପଡିଛି ।
ସେହିପରି କାମାକ୍ଷାନଗର ତୁମୁସିଂହା ଖଇରାକଣ ବସ୍ତିର ଗଗନ ବେହେରା ବିଲରୁ ଘରକୁ ଫେରିବା ବେଳେ ହାତୀ ହାବୁଡ଼ରେ ପଡିଯାଇଥିଲେ । ତାଙ୍କୁ ହାତୀ ଆକ୍ରମଣ କରିବାରୁ ସେ ଗୁରୁତର ହୋଇଛନ୍ତି । ସେପଟେ କାମାକ୍ଷାନଗର ପଶ୍ଚିମାଞ୍ଚଳ ବନାଞ୍ଚଳର ପାକଟମୁଣ୍ଡା ନିକଟରେ କାମ ସାରି ଘରକୁ ଫେରୁଥିବା ବେଳେ ହାତୀ ଜଣଙ୍କୁ ଆକ୍ରମଣ କରିଛି । ଫଳରେ ଗୁରୁତର ହୋଇଥିବାରୁ ତାଙ୍କୁ ପ୍ରଥମେ କାମାକ୍ଷାନଗର ଡାକ୍ତରଖାନା ଓ ପରେ ଢେଙ୍କାନାଳ ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇଁ ସ୍ଥାନନ୍ତରିତ କରାଯାଇଛି । ଗୁରୁତର ଜଣଙ୍କ ପାକଟ ମୁଣ୍ଡା ଗ୍ରାମର ସତ୍ୟାନନ୍ଦ ସ୍ୱାଇଁ ବୋଲି ଜଣାପଡିଛି ।
