ଜଗତସିଂହପୁର ୦୨|୦୧: ସାନ ଭାଇର ଭୁଜାଲି ଚୋଟରେ ବଡ ଭାଇ ଗୁରୁତର ହୋଇଛି ।  ଜଗତସିଂହପୁର ସଦର ଥାନା କଣ୍ଟାପଡା ଗାଁରେ ଜମିବାଡି ବିବାଦକୁ ନେଇ ଘଟିଛି ଏଭଳି ଅଘଟଣ । ଗାଁର ଚକ୍ରଧର ସ୍ବାଇଁ ଓ ତାଙ୍କ ସାନ ଭାଇ ଠୁକୁରାଙ୍କ ମଧ୍ୟରେ ଜମିକୁ ନେଇ କିଛି ଦିନ ଧରି ବିବାଦ ଚାଲିଥିଲା । ଗତକାଲି ସଂଧ୍ୟାରେ ଉଭୟଙ୍କ ମଧ୍ୟରେ ଝଗଡା ଉଗ୍ରରୂପ ନେଇଥିଲା । ସାନଭାଇ ଠୁକୁରା ଉତକ୍ଷିପ୍ତ ହୋଇ ବଡଭାଇ ଚକ୍ରଧରଙ୍କୁ ଭୁଜାଲିରେ ଆକ୍ରମଣ କରିଥିଲା । ଫଳରେ ତାଙ୍କର ଡାହାଣ ହାତ ଓ ମୁଣ୍ଡରେ ଗଭୀର କ୍ଷତ ହୋଇଛି । ଗୁରୁତର ଅବସ୍ଥାରେ ପ୍ରଥମେ ଜଗତସିଂହପୁର ଓ ପରେ କଟକ ସ୍ଥାନାନ୍ତର କରାଯାଇଛି । ଆକ୍ରମଣ ପରେ ଠୁକୁରା ଘଟଣାସ୍ଥଳରୁ ଫେରାର ହୋଇଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।