ମୁମ୍ବାଇ ୨୬/୬ : ଧୀରେ ଧୀରେ ବଢିବାରେ ଲାଗିଛି ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖଙ୍କ ସମସ୍ୟା । ୧୦୦ କୋଟି ଟଙ୍କା ଲାଞ୍ଚ ନେଇଥିବା ଅଭିଯୋଗରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଅନିଲ ଦେଶମୁଖଙ୍କୁ ଜାରି କରିଛି ସମନ । ସକାଳ ୧୧ଟାରେ ଦେଶମୁଖଙ୍କୁ ପଚରାଉଚରା ପାଇଁ ଡକାଯାଇଛି । ଗତକାଲି ରାତିରେ ତାଙ୍କର ଦୁଇଜଣ ସହାୟକଙ୍କୁ ଇଡି ଗିରଫ କରିଥିଲା ।

ଏବେ ମଧ୍ୟ ଅନିଲ ଦେଶମୁଖଙ୍କ ଗିରଫଦାରୀକୁ ଏଡ଼ାଇ ଦିଆଯାଇପାରିବ ନାହିଁ । ପ୍ରାୟ ନଅ ଘଣ୍ଟା ଧରି ପଚରାଉଚରା ପରେ ଇଡି ଶୁକ୍ରବାର ଦିନ ଦେଶମୁଖଙ୍କ ବ୍ୟକ୍ତିଗତ ସଚିବ ସଞ୍ଜୀବ ପାଲାଣ୍ଡେ ଏବଂ ବ୍ୟକ୍ତିଗତ ସହାୟକ କୁନ୍ଦନ ସିନ୍ଦେଙ୍କୁ PMLA ନିୟମ ଅନୁଯାୟୀ ଗିରଫ କରିଥିଲା । ଅଭିଯୋଗ ହୋଇଛି ଯେ ମୁମ୍ବାଇର ବଲାର୍ଡ ଇଷ୍ଟେଟରେ ଥିବା କେନ୍ଦ୍ରୀୟ ଅନୁସନ୍ଧାନ ଏଜେନ୍ସି କାର୍ଯ୍ୟାଳୟରେ ପଚରାଉଚରା ବେଳେ ଉଭୟ ବ୍ୟକ୍ତି ସହଯୋଗ କରୁନାହାଁନ୍ତି।