ଜଳେଶ୍ଵର, ୨୯/୦୬ : ମର୍ମନ୍ତୁଦ ସଡକ ଦୁର୍ଘଟଣା । ଜୀବନ ହାରିଲେ ମାଆ ଓ ଝିଅ । ଏପରି ଏକ ଅଭାବନୀୟ ଘଟଣା ଘଟିଛି ବାଲେଶ୍ଵର ଜିଲ୍ଲା ୬୦ ନମ୍ବର ଜାତୀୟ ରାଜପଥର ନିଧିପଣ୍ଡା ଓଭରବ୍ରିଜ ନିକଟରେ ।
ବାଇକରେ ଯାଉଥିବା ସମୟରେ ଅଜଣା ଗାଡ଼ି ଧକ୍କାରେ ମା, ଝିଅଙ୍କର ମୃତ୍ୟୁ ହୋଇଥିବା ବେଳେ ବାପ-ପୁଅ ଗୁରୁତର ହୋଇଛନ୍ତି। ଗୁରୁତରଙ୍କୁ ବାଲେଶ୍ଵର ସ୍ଥାନାନ୍ତର କରାଯାଇଛି। ସୂଚନା ଅନୁସାରେ, ବାଲେଶ୍ଵର ଟୁଲଙ୍ଗ ସାହିର ରେଣୁକା ମହାପାତ୍ର (୩୩) ତାଙ୍କ ସ୍ୱାମୀ ମଣ୍ଟୁ ମହାପାତ୍ର ଏବଂ ପୁଅ ସୈାରଭ ମହାପାତ୍ର ଓ ଝିଅ ରୂପାଲି ମହାପାତ୍ର (୧୩) ସୋମବାର ରୂପସା ଥାନା ଅନ୍ତର୍ଗତ ଜମୁନିଆ ଶ୍ଵଶୁର ଘରକୁ ବୁଲିବା ପାଇଁ ଯାଇଥିଲେ । ସକାଳ ସମୟରେ ସେମାନେ ଶ୍ୱଶୂର ଘରେ ପହଁଚିଥିଲେ । ଦ୍ଵିପ୍ରହରରେ ଖାଇସାରି ସନ୍ଧ୍ୟା ୬ଟା ସମୟରେ ଘରକୁ ଫେରିଲା ବେଳେ ରାଜପଥର ନିଧିପଣ୍ଡା ବ୍ରିଜ ନିକଟରେ ଏକ ଟ୍ରକ ତାଙ୍କ ଉପରକୁ ମାଡିଯାଇଥିଲା।
ଘଟଣାସ୍ଥଳରେ ମାଆ ଏବଂ ଝିଅ ପ୍ରାଣ ହରାଇ ଥିବା ବେଳେ ବାପ-ପୁଅ ଗୁରୁତର ହୋଇଛନ୍ତି। ଘଟଣାସ୍ଥଳରେ ସଦର ଥାନା ପୋଲିସ ପହଞ୍ଚି ମୃତଦେହ ଉଦ୍ଧାର କରି ବ୍ୟବଛେଦ ପାଇଁ ପଠାଇ ତଦନ୍ତ ଜାରି ରଖିଛି। ତେବେ ଦୁର୍ଘଟଣା ଘଟାଇଥିବା ଟ୍ରକଟି ଫେରାର ହୋଇଯାଇଛି।
