ଦୂର୍ଗାପୁର ୧୭/୦୧ : ମାତା-ପିତା ପିଲାମାନଙ୍କର ଶୁଭ ଚିନ୍ତକ ହୋଇଥାନ୍ତି । ଅନେକ ସମୟରେ ଶିକ୍ଷକମାନେ ଛାତ୍ରଛାତ୍ରୀଙ୍କୁ ଅମାନବୀୟ ଭାବେ ଦଣ୍ଡ ଦେଉଥିବା ଘଟଣା ସାମ୍ନାକୁ ଆସିଛି । ଏଭଳି ସମୟରେ ଯଦି ନିଜ ଜନ୍ମ କଲା ବାପା ନିଜ ଛୁଆ ପ୍ରତି କୃର ହୋଇଯାଏ ତେବେ ଏହାକୁ କଣ କରାଯିବ । ଏଭଳି ଏକ ଘଟଣା ଘଟିଛି ପଶ୍ଚିମବଙ୍ଗର ଦୂର୍ଗାପୁରରେ ।
ପାଠ ନପଢିବାରୁ ଜଣେ ବାପା ନିଜ ପିଲାମାନଙ୍କୁ ଏଭଳି ଦଣ୍ଡ ଦେଇଛନ୍ତି ଯାହାକୁ ଶୁଣିଲେ ଲୋମ ଟାଙ୍କୁରୀ ଉଠିବ । ପଶ୍ଚିମ ବର୍ଦଓ୍ବାନ ଜିଲ୍ଲା ପାଣ୍ଡେଶ୍ବରର ଖୁଟ୍ଟାଡୀହ ଅଞ୍ଚଳରେ ଘଟିଛି ଏଭଳି ଘଟଣା । ଯେଉଁଠାରେ ଗତ ଶନିବାର ଦିନ ଜଣେ ପିତା, ପାଠ ପଢୁନଥିବାରୁ ନିଜ ଝିଅର ଗାଲରେ ଗରମ ତାଓ୍ବା ଲଗାଇଦେଇଛନ୍ତି ।
ଏହାକୁ ନେଇ ସ୍ଥାନୀୟ ଲୋକେ କହିଛନ୍ତି, ଅନେକ ସମୟରେ ଉକ୍ତ ମା-ବାପା ନିଜ ପିଲାମାନଙ୍କୁ ଉପରେ ଏଭଳି ଅତ୍ୟାଚାର କରନ୍ତି । ପାଠ ପଢୁନଥିବାରୁ ଏଭଳି କୃରତା ଦେଖାଇବାକୁ ପଛାନ୍ତି ନାହିଁ ଏହି ଦମ୍ପତ୍ତି । ଏହା ନୂଆ କଥା ନୁହେଁ ବରଂ ଏଭଳି ଘଟଣା ଆଗରୁ ଅନେକ ଥର ଘଟିଥିବା କହିଛନ୍ତି ସ୍ଥାନୀୟ ଲୋକେ ।
ତେବେ ଭୁଲ ବୁଝିବା ପରେ ଅଭିଯୁକ୍ତ ପିତା ଅଶୋକ ତିଓ୍ବାରୀ ପୋଲିସ ଠାରୁ ରକ୍ଷାପାଇବା ପାଇଁ ପଡୋଶୀଙ୍କ ନିକଟରେ କାନ ଧରି ଭୁଲ ମାଗିଛନ୍ତି । ଆଗାମୀ ଦିନରେ ଏଭଳି କିଛି କରିବେ ନାହିଁ ବୋଲି ପ୍ରତିଶ୍ରୁତି ମଧ୍ୟ ଦେଇଥିଲେ । ଅନ୍ୟପଟେ ଦ୍ବିତୀୟ ଏବଂ ତୃତୀୟ ଶ୍ରେଣୀରେ ପଢୁଥିବା ଦୁଇ ଶିଶୁ ଭୟଭୀତ ଅବସ୍ଥାରେ ଅଛନ୍ତି । ଗତ ଶନିବାର ଏଭଳି କୃରତା ଦେଖି ପଡୋଶୀମାନେ ପୋଲିସକୁ ଖବର ଦେବା ପାଇଁ ଧମକ ଦେଇଥିଲେ । ଏହା ପରେ ଉକ୍ତ ପିତାଜଣକ କାନ ଧରି ଭୁଲମାଗିବା ସହ ଆଗାମୀ ଦିନରେ ଏଭଳି ନକରିବା ପାଇଁ ପ୍ରତିଶ୍ରୁତି ଦେଇଥିଲେ ।