ଦେବୀ ଦୁର୍ଗା ଓହ୍ଲାଇ ଆସିଛନ୍ତି ମାଟିକୁ । ମାଟିରେ ତାଙ୍କ ମୃଣ୍ମୀୟୂ ମୂର୍ତ୍ତି ଝଲସୁଛି । ଶରତର ନିର୍ମଳ ଆକାଶ ଓ କାଶତଣ୍ଡୀର ଖିଲି ଖିଲି ହସ ତାଙ୍କୁ ସ୍ବାଗତ କରୁଛି । ଜାଗି ଉଠୁଛି, ବଞ୍ଚିବାର ଅୟୁତ କାମନା । ଚାରିଆଡେ ଶୁଭୁଛି ଦଶଭୂଜାଙ୍କ ପ୍ରାର୍ଥନା । ମାଆର ବନ୍ଦନା । ଆମ ସାମାଜିକ ଜୀବନର ଏ କାହାଣୀବି’ ପ୍ରତିଫଳିତ ହୋଇଛି ପରଦାରେ । ପ୍ରଦର୍ଶିତ ହୋଇଛି ଦେବୀଶକ୍ତିର ରୂପ ।
୧୯୭୧-‘ତୁଲସୀ ବିବାହ’ ରୁ ବଲିଉଡରେ ପଡିଥିଲା ପୌରାଣିକ ଚଳଚ୍ଚିତ୍ରର ଭିତ୍ତିଭୂମି । ଦେବୀଶକ୍ତିକୁ ନେଇ ୧୯୭୫ରେ ପ୍ରଥମେ ମୁକ୍ତିଲାଭ କରିଥିଲା ଚଳଚ୍ଚିତ୍ର “ଜୟ ସନ୍ତୋଷୀ ମା’ କିନ୍ତୁ ଦେବୀ ଦୁର୍ଗା, ସେରାୱାଲିଙ୍କୁ ନେଇ ଚଳଚ୍ଚିତ୍ର ‘ସୁହାଗ’ରେ ସଂଯୋଜିତ ହୋଇଥିବା ଗୀତ ଓ ଚିତ୍ର ଦର୍ଶକଙ୍କୁ କରିଥିଲା ଆକୃଷ୍ଟ ।
୧୯୭୯ରେ ମୁକ୍ତିଲାଭ କରିଥିବା ଏ ଚଳଚ୍ଚିତ୍ରର ନାୟକ ଥିଲେ ବିଗ୍-ବି ଅମିତାଭ ବଚ୍ଚନ ଓ ନାୟିକା ରେଖା । ଲକ୍ଷ୍ମୀକାନ୍ତ ପ୍ୟାରେଲାଲଙ୍କ ସଙ୍ଗୀତରେ ଗୀତଟି ରେକର୍ଡ ହୋଇଥିଲା, ଆଶା ଭୋଁସଲେ ଓ ମହମ୍ମଦ ରଫିଙ୍କ କଣ୍ଠରେ ।
ଶେରାୱାଲୀଙ୍କ ଗୀତ ଓ ଚିତ୍ରକୁ ନେଇ ଅମିତାଭଙ୍କ ଆଉ ଦୁଇଟି ଚଳଚ୍ଚିତ୍ର ‘ମର୍ଦ୍ଦ’ ଓ ‘କୋହରାମ’ରେ ଦେଖିବାକୁ ମିଳିଛି । ‘କୋହରାମ୍’ ୧୯୯୯ରେ ରିଲିଜ ହୋଇଥିବା ବେଳେ ‘ମର୍ଦ୍ଦ’ ରିଲିଜ ହୋଇଥିଲା ୧୯୮୫ରେ । ଚଳଚ୍ଚିତ୍ରରେ ନିଜ ମା’ପାଇଁ ମା’ ଶେରାୱାଲିଙ୍କ ପାଖରେ ଥିଲା ଆକୁଳ ପ୍ରାର୍ଥନା । ଅନୁ ମଲ୍ଲୀକ ଏ ଗୀତଟି କମ୍ପୋଜ କରିଥିବା ବେଳେ ଆୱାଜ ଦେଇଥିଲେ ସବୀର କୁମାର ।
ମା’ ଶେରାୱାଲିଙ୍କୁ ନେଇ ଆଉ ଏକ ଦମଦାର ଆୱାଜର ଦସ୍ତକ ଥିଲା ଚଳଚ୍ଚିତ୍ର ‘ଆଶା’ରେ । ୧୯୮୦ରେ ରିଲିଜ ହୋଇଥିବା ଏ ଫିଲ୍ମରେ ନରେନ୍ଦ୍ର ଚଞ୍ଚଲ୍ ଓ ମହମ୍ମଦ ରଫିଙ୍କ ଆୱାଜ ଛଇଁଥିଲା ସମସ୍ତଙ୍କୁ । ମ୍ୟୁଜିକ କମ୍ପୋଜର ଥିଲେ ଲକ୍ଷ୍ମୀକାନ୍ତ ପ୍ୟାରେଲାଲ୍ ।
ଉଚ୍ଚା ପର୍ବତ, ଲମ୍ବା ରାସ୍ତା କଟିଯାଏ ମାଙ୍କ ଭକ୍ତିରେ । ରାଜା ହେଉ କି ଭିକାରୀ ସମସ୍ତେ ମା’ଙ୍କ ଦରବାରରେ ସମାନ । ସନ୍ତାନର ସୁଖ ପାଇଁ ସାରା ଦୁନିଆରେ ଗୋଟିଏ ଠିକଣା, ମା’ । ମା ଶେରାୱାଲି । ଏମିତି ଏକ ଥିମ୍ କୁ ନେଇ ଫିଲ୍ମ ଅବତାର ରେ ସଂଯୋଜିତ ହୋଇଥିଲା ଏକ ଗୀତ । ଯାହା ଆଜିବି ଦର୍ଶକଙ୍କ ହୃଦୟରେ ଭକ୍ତି ସଞ୍ଚାର କରୁଛି । ନରେନ୍ଦ୍ର ଚଞ୍ଚଲଙ୍କ ଦମଦାର ଆୱାଜ୍ , ତାଙ୍କ ସହିତ ମହେନ୍ଦ୍ର କପୁର ଓ ଆଶା ଭୋଁସଲେ । ଫିଲ୍ମ’ ଅବତାର’ଗୀତ ଆଜିବି ଦର୍ଶକଙ୍କ ପ୍ରିୟ । ୧୯୮୩ରେ ରିଲିଜ ହୋଇଥିବା ଏ ଫିଲ୍ମରେ ଦେଖିବାକୁ ମିଳିଥିଲା ରାଜେଶ ଖାନ୍ନା ଓ ସବାନା ଆଜମୀଙ୍କ ଯୋଡି ।
୧୯୮୩ ର ଫିଲ୍ମ ‘ମେହରବାନ୍’ରେ ମା ଜଗଦମ୍ବାଙ୍କ ଶକ୍ତିକୁ ନେଇ ସଂଯୋଜିତ ହୋଇଥିଲା ଆଉ ଏକ ଗୀତ । ମାଙ୍କ ଦ୍ବାରରେ ପ୍ରାର୍ଥନା କରୁଥିଲେ ଜୀବନ ଯୁଦ୍ଧରେ ହାରିଯାଇଥିବା ନାୟକ । ଫିଲ୍ମର ନାୟକ ଥିଲେ ମିଥୁନ ଚକ୍ରବର୍ତ୍ତୀ ।
୧୯୯୪ରେ ରିଲିଜ ହୋଇଥିଲା ଫିଲ୍ମ ‘କ୍ରାନ୍ତୀବୀର’ । ଫିଲ୍ମରେ ଅମ୍ବେ, ମା ଜଗଦମ୍ବେଙ୍କ ପାଇଁ ସଂଯୋଜିତ ହୋଇଥିବା ଗୀତ ଖୁବ ମଚାଇଥିଲା ଧୁମ୍ । ଦେଶପ୍ରେମ ଓ ସାମାଜିକ କାହାଣୀର ଏ ଫିଲ୍ମରେ ମା ଜଗଦମ୍ବେଙ୍କ ପାଇଁ ଥିଲା ପ୍ରାର୍ଥନା । ମୁଖ୍ୟ ଭୁମିକାରେ ଥିଲେ ନନା ପାଟକର ଓ ଡିମ୍ପଲ କପାଡିଆ ।
୧୯୯୬ରେ ରିଲିଜ ହୋଇଥିଲା ଫିଲ୍ମ ‘ଖିଲାଡିଓଁ କି ଖିଲାଡି’ । ନାୟକ ଥିଲେ ଖିଲାଡି ଷ୍ଟାର ଅକ୍ଷୟ କୁମାର । ଶତ୍ରୁ ସଂଘାର ପାଇଁ ନାୟକର ସଂଘର୍ଷକୁ ଆଶୀର୍ବାଦ କରିବା ପାଇଁ ଏଠି ଥିଲେ ମା ଶେରାୱାଲି । ଅନୁ ମଲ୍ଲୀକଙ୍କ ମ୍ୟୁଜିକ କମ୍ପୋଜରେ ଏ ଗୀତକୁ ଆୱାଜ ଦେଇଥିଲେ ସୋନୁ ନିଗମ୍ ।
ମା ଶେରାୱାଲୀ ହେଉ କିମ୍ବା ତାଙ୍କ ଶେର୍ କେହିନା କେହି ଶତ୍ରୁ ନିପାତ ପାଇଁ ଆସନ୍ତି ଏ ଧରାକୁ । ମାଙ୍କ ଆଶୀର୍ବାଦରେ ସଂଘର୍ଷକୁ ମିଳେ ଆଶୀର୍ବାଦ ।
ରାଜା ହେଉ କି ରଙ୍କ ସମସ୍ତେ ଦେବୀଶକ୍ତିଙ୍କ ପାଖରେ ନତ ମସ୍ତକ । ଠାକୁରାଏନ୍ ହେଉ କି ତୱାଇଫ୍ କାହାକୁ ଦେବୀଙ୍କ ପୂଜାରେ ସାମିଲ ହେବାକୁ ଲଗାଯାଇ ପାରିବ ନାହିଁ ରୋକ୍ । ଏ ମିତି ବଲିଉଡର ଆଉ କିଛି ଚଳଚ୍ଚିତ୍ରରେ ଦେଖିବାକୁ ମିଳିଛି ଏମିତି ଗୀତ ଓ ଚିତ୍ର ।କେବେ ଭକ୍ତିଗୀତରେ ଓ ଭଜନରେ ଦେଖିବାକୁ ମିଳିଛି ଦେବୀଙ୍କ ଶକ୍ତିର ମହିମା । କେତେ ରୂପରେ ମା ଆବିର୍ଭାବ ହୋଇ କରିଛନ୍ତି ଆଶୀର୍ବାଦ ।
୨୦୦୨ର ଫିଲ୍ମ ‘ଦେବଦାସ’ରେ ମାଙ୍କ ପୂଜା ମଣ୍ଡପରେ ଚିତ୍ରାୟିତ ହୋଇଥିଲା ଏ ଗୀତ । ଜଣେ ଠାକୁରାଏନଙ୍କ ସହିତ ମାଙ୍କ ପୂଜାରେ ସାମିଲ ଥିଲେ ଜଣ ତୱାଇଫ । ଏ ଦୁଇ ଚରିତ୍ରରେ ଦେଖିବାକୁ ମିଳିଥିଲା ଐଶୋର୍ଯ୍ୟା ରାୟ ବଚ୍ଚନ ଓ ମାଧୁରୀ ଦିକ୍ଷୀତଙ୍କୁ ।
୨୦୧୨ରେ ବିଦ୍ୟା ବାଲାନଙ୍କ ଅଭିନୀତ ଫିଲ୍ମ ‘କାହାନୀ’ରେ ସଂଯୋଜିତ ହୋଇଥିଲା କୋଲକାତାର ଦୁର୍ଗାପୂଜା ଚିତ୍ର । ଏହା ସହିତ ଦେବୀ ଦୁର୍ଗା ଶକ୍ତି, ମା ଦୁର୍ଗା ଶକ୍ତି ତୁହି ଦୁର୍ଗା ତୁହି କାଳୀ ପରି ବଲିଉଡର କିଛି ଡବିଂ ଫିଲ୍ମରେ ଦେଖିବାକୁ ମିଳିଥିଲା ମା ଦୁର୍ଗାଙ୍କ ମହିମାର ମାୟ । ମାଙ୍କର ମାୟାରେ ହିଁ ଆତଯାତ ଏ ଜଗତ । ସେ ହିଁ ଆଦି, ସେ ହିଁ ଅନ୍ତ ।
ଉପସ୍ଥାପନା : ସୁବ୍ରତ ଜେନା
