କୋରାପୁଟ, ୦୯।୧୧: ମଦୁଆ ସ୍ବାମୀର ବର୍ବର କାଣ୍ଡ।ମଦ ନିଶାରେ ସ୍ତ୍ରୀର ଗଳା କାଟି କଲା ହତ୍ୟା। ଏପରି ଏକ ଘଟଣା କୋରାପୁଟ ଜିଲ୍ଲାରେ ଆଲୋଡନ ସୃଷ୍ଟି କରିଛି ।
ସୂଚନାନୁସାରେ, କୋରାପୁଟ ଜିଲ୍ଲା ଦେବିଘାଟ ଗ୍ରାମପଞ୍ଚାୟତର ଧୌଡା ପଦର ଗ୍ରାମରେ ରୁହନ୍ତି କାର୍ତ୍ତିକ ଟାକ୍ରି ଓ ତାଙ୍କ ସ୍ତ୍ରୀ ପାର୍ବତୀ । ମଦ ପିଇବାକୁ ନେଇ ସ୍ବାମୀ କାର୍ତ୍ତିକ ଟାକ୍ରି ଓ ସ୍ତ୍ରୀ ପାର୍ବତୀଙ୍କ ମଧ୍ୟରେ ସବୁ ଦିନ ଝଗଡା ଲାଗି ରହେ। କିନ୍ତୁ ରବିବାର ଏହା ଉଗ୍ର ରୂପ ଧାରଣ କରିଥିଲା । ରବିବାର ବିଳମ୍ବିତ ରାତିରେ ମଦ ପିଇ କାର୍ତ୍ତିକ ଘରକୁ ଆସିଥିବାରୁ ଏହାକୁ ବିରୋଧ କରିଥିଲେ ସ୍ତ୍ରୀ ପାର୍ବତୀ ।ଏହାକୁ ନେଇ ସ୍ବାମୀ ସ୍ତ୍ରୀଙ୍କ ମଧ୍ୟରେ ବଚସା ହୋଇଥିଲା ।
ଏଥିରେ ଉତକ୍ଷିପ୍ତ ହୋଇ କାର୍ତ୍ତିକ ଏକ ଧାରୁଆ ଅସ୍ତ୍ରରେ ସ୍ତ୍ରୀର ବେକ କାଟି ଦେଇ ଥିଲେ । ଏନେଇ ପାର୍ବତୀଙ୍କ ବାପା କୋରାପୁଟ ସଦର ଥାନାରେ ଅଭିଯୋଗ କରିଛନ୍ତି। ଏହାସହ ଥାନାରେ ଏକ ମାମଲା ଦାୟର ହୋଇଥିବା ବେଳେ ପୋଲିସ ଘଟଣାସ୍ଥଳରେ ପହଁଚି ମୃତଦେହ ଉଦ୍ଧାର କରିଛି । ମୃତଦେହକୁ ବ୍ୟବଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି।ଏହାସହ ଅଭିଯୁକ୍ତ ସ୍ବାମୀ କାର୍ତ୍ତିକକୁ ଅଟକ ରଖି ଅଧିକ ପଚରାଉଚରା କରୁଛି ପୋଲିସ।