ଭଦ୍ରକ, ୧୮|୦୯ : ସାଙ୍ଗ କାର ନେଇ ଗାଁକୁ ଆସିଥିଲା । ସେଥିରୁ କାରକୁ ନେଇ ଚଳାଇବା ଶିଖୁଥିଲେ ଯୁବକ । କିନ୍ତୁ ଶିଖିବା ଭିତରେ ଜଳଖିଆ ଦୋକାନକୁ ଧକ୍କା ଦେଇ ଦୋକାନ ଭିତରେ ପସିଗଲା କାର। କାର ମାଲିକ ରହିଗଲେ ଆଉ ଗାଡି ଚଳାଉଥିବା ସାଙ୍ଗ ଫେରାର ହୋଇଗଲା । ଏମିତି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ମଞ୍ଜୁରୀରୋଡ଼ ବଜାରରେ ।
ସୂଚନା ଅନୁଯାୟୀ, ମଞ୍ଜୁରୀରୋଡ଼ ବଜାରରେ ଜନୈକ ବ୍ୟକ୍ତି ପାନ ଦୋକାନ କରିଥିଲେ । ତାଙ୍କ ସାଙ୍ଗ ଅନ୍ୟ ଜିଲ୍ଲାରୁ କାରରେ ଆସିଥିଲେ । ସେଠାରେ ସାଙ୍ଗର କାର ନେଇ ଡ୍ରାଇଭିଂ ଶିଖିବା ପାଇଁ ବାହାରିଲେ । କାର ମାଲିକ ଗାଡିରେ ବସିଥିବା ବେଳେ ସାଙ୍ଗ କାର ଚଳାଉଥିଲେ । ହଠାଥ ଗାଡିର ଭାରସାମ୍ୟ ହରାଇ କାରଟି ଜଳଖିଆ ଦୋକାନ ଆଡକୁ ମାଡିଯାଇଥିଲା ।
କାରଟି ଦୋକାନ ଭିତରେ ପସିଯିବା ସମୟରେ ଦୋକାନରେ ଥିବା ଯୁବକ ଦୌଡ଼ି ପଳାଇବାରୁ ଅଳ୍ପକେ ବର୍ତ୍ତି ଯାଇଥିଲେ । ପରେ କାର ଡ୍ରାଇଭିଂ ଶିଖୁଥିବା ସାଙ୍ଗ ଯେନେତେନେ କାରରୁ ବାହାରି ପଳାଇଯାଇଥିଲେ । ସ୍ଥାନୀୟ ଲୋକେ କାର ଭିତରୁ ମାଲିକଙ୍କୁ ବାହାର କରି ମଞ୍ଜୁରୀରୋଡ଼ ଫାଣ୍ଡିରେ ଜିମା ଦେଇଥିବା ସୁଚନା ମିଳିଛି । ତେବେ କାର ଡ୍ରାଇଭିଂ ଶିଖୁଥିବା ଯୁବକ ଜଣକ ଫେରାର ଥିବା ସୂଚନା ମିଳିଛି ।
