ଧର୍ମଗଡ଼ ୦୨।୦୭: ଦୁଇ ଦୁଇ ଜଣ ସ୍ତ୍ରୀ ଏବଂ ଉଭୟଙ୍କ କୋଳରେ ଦୁଇଟି କନ୍ୟା ସନ୍ତାନ ଥାଉ ଥାଉ ଆଉ ଜଣେ ଛାତ୍ରୀଙ୍କୁ ପ୍ରେମରେ ଫସାଇ ଫେରାର ମାରିଥିଲା ବସ୍ ଡ୍ରାଇଭର । ଛାତ୍ରୀଙ୍କ ସହ ଲକ୍ଷାଧିକ ଟଙ୍କାର ଓ ସୁନା ମଧ୍ୟ ସାଙ୍ଗରେ ନେଇ ଯାଇଥିଲା । ହେଲେ ଛାତ୍ରୀଙ୍କ ପରିବାରର ଅଭିଯୋଗ ପରେ ସିଧା ଜେଲ୍କୁ ଗଲା ଅଭିଯୁକ୍ତ । ଏଭଳି ଏକ ଘଟଣା କଳାହାଣ୍ଡି ଜିଲ୍ଲା ଧର୍ମଗଡ଼ ଥାନାଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଅଭିଯୁକ୍ତ ଡ୍ରାଇଭର କେଁଗାଁ ଥାନା ଚପ୍ରଆ ଗାଁର ଆନନ୍ଦ ଦାସ (୩୦) ।
ପୁଲିସ ସୂଚନାମତେ, ଧର୍ମଗଡ଼ ଥାନା ଅଞ୍ଚଳର ଛାତ୍ରୀ ଜଣକ ଅନ୍ୟ ଏକ ବ୍ଲକ୍ରେ ଏକ କଲେଜରେ ପଢ଼ୁଥିଲେ । କଲେଜଟି ଘରଠାରୁ ଦୂରରେ ଥିବାରୁ ସେ ନିୟମିତ ବସ୍ରେ ଯିବା ଆସିବା କରୁଥିଲେ । ଏହି ସମୟରେ ବସ୍ ଡ୍ରାଇଭର ଆନନ୍ଦ ସହ ତାଙ୍କର ଚିହ୍ନା ପରିଚୟ ହୋଇଥିଲା । ଏପରି କି ପୂର୍ବରୁ ଦୁଇ ଥର ବିବାହ କରିଥିଲେ ମଧ୍ୟ ଆନନ୍ଦ ଛାତ୍ରୀଙ୍କୁ ପ୍ରେମ ଜାଲରେ ଫସାଇଥିଲା । ପରେ ବିବାହର ପ୍ରଲୋଭନ ଦେଖାଇ ଜୁନ ୭ରେ ଛାତ୍ରୀଙ୍କୁ ଆନନ୍ଦ ଘରୁ ଫେରାର କରି ନେଇଥିଲା । ଘରୁ ଗଲା ସମୟରେ ଛାତ୍ରୀ ଜଣକ କିଛି ସୁନା ଓ ୧ ଲକ୍ଷ ୧୦ ହଜାର ଟଙ୍କା ମଧ୍ୟ ନେଇ ଯାଇଥିଲେ ।
ଛାତ୍ରୀ ନିଖୋଜ ହେବା ପରେ ଘର ଲୋକ ବହୁ ଖୋଜାଖୋଜି କରି ପାଇନଥିଲେ । ଏ ନେଇ ଧର୍ମଗଡ଼ ଥାନାରେ ଅଭିଯୋଗ କରିଥିଲେ । ପୁଲିସ ମାମଲା ରୁଜୁ କରି ତନାଘନା କରିଥିଲା । କୌଣସି ସୂତ୍ରରୁ ଖବର ପାଇ ଗତକାଲି ଭବାନୀପାଟଣା ଆଇଟିଆଇ ପଛପଟ ଥିବା ଏକ ଘର ଉପରେ ପୁଲିସ ଚଢ଼ଉ କରି ଉଭୟଙ୍କୁ ଧରିଥିଲା । ଛାତ୍ରୀଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଥିଲା । ଆନନ୍ଦକୁ ଗିରଫ କରିଥିଲା । ଆଜି ତାକୁ କୋର୍ଟଚାଲାଣ କରିଥିଲା । ପ୍ରଥମ ସ୍ତ୍ରୀ ଥାଉ ଥାଉ ଦ୍ୱିତୀୟ ବିବାହ କରିବା ଅପରାଧ ହୋଇଥିବାବେଳେ ଦୁଇଥର ବିବାହ କରି ପୁଣି ଜଣେ ନିର୍ବୋଧ ଛାତ୍ରୀଙ୍କୁ ପ୍ରେମ ଜାଲରେ ଫସାଇଥିବା ବସ୍ ଡ୍ରାଇଭରକୁ କଠୋର କାର୍ଯ୍ୟାନୁଷ୍ଠାନ ପାଇଁ ଛାତ୍ରୀଙ୍କ ପରିବାର ଲୋକେ ଦାବି କରିଛନ୍ତି।
