ନୂଆଦିଲ୍ଲୀ୨୨/୬: ଗତ ୧୫ ତାରିଖରେ ଭାରତ-ଚୀନ ସେନା ମଧ୍ୟରେ ଗଲୱାନ୍ ଘାଟିରେ ହୋଇଥିବା ହାତାହାତି ଘଟଣାରେ ଚୀନ୍ରେ ଜଣେ କମାଣ୍ଡିଂ ଅଫିସରଙ୍କ ମୃତ୍ୟୁ ହୋଇଛି । ଏକଥା ମାନିଛି ଚୀନ୍ । ଆଜି ଉଭୟ ଦେଶ ମଧ୍ୟରେ ଚାଲିଥିବା ସେନା ସ୍ତରୀୟ ବୈଠକରେ ଚୀନ୍ ଏହି କଥା ମାନିଥିବା କୁହାଯାଉଛି । ତେବେ ତାର କେତେ ସୈନିକ ପ୍ରାଣ ହରାଇଛନ୍ତି ସେ କଥା କିନ୍ତୁ ଚୀନ୍ ସ୍ପଷ୍ଟ କରୁନି । ଉଭୟ ଦେଶ ମଧ୍ୟରେ ଏବେବି ସୀମାରେ ଉତ୍ତେଜନା ଲାଗି ରହିଥିବା ବେଳେ ସୀମାରେ ଉଭୟ ଦେଶର ହଜାରରୁ ଅଧିକ ଲେଖାଏଁ ଯବାନ ପହରା ଦେଉଛନ୍ତି । ସେପଟେ ଋଷ ଗସ୍ତରେ ଅଛନ୍ତି ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ।
ଶେଷରେ ମାନିଲା ଡ୍ରାଗନ୍ । ଲଦାଖ ଗଲୱାନ୍ ଘାଟିରେ ଭାରତ-ଚୀନ୍ ସେନା ମଧ୍ୟରେ ହାତାହାତି ଘଟଣାରେ ଚୀନ୍ର ଜଣେ କମାଣ୍ଡିଂ ଅଫିସରଙ୍କ ମୃତ୍ୟୁ ହୋଇଥିବା ଚୀନ୍ ମାନିଛି । ଆଜି ଲେଫଟନାଣ୍ଟ ଜେନେରାଲ୍ ସ୍ତରୀୟ କଥାବାର୍ତ୍ତା ବେଳେ ଚୀନ୍ ଏହି କଥା ସ୍ବୀକାର କରିଛି । ଭାରତର ଜଣେ କର୍ଣ୍ଣେଲଙ୍କ ସମେତ ୨୦ ଜଣ ଯବାନ ସହିଦ ହୋଇଥିବା ବେଳେ ଚୀନ୍ର ଜଣେ କମାଣ୍ଡିଂ ଅଫିସଙ୍କ ସମେତ ପାଖାପାଖି ୪୫ ଜଣ ସୈନିକ ମୃତାହତ ହୋଇଥିବା ଭାରତ ଦାବି କରୁଥିଲା । ହେଲେ ଚୀନ୍ ସେନା କି ଚୀନ ଗଣମାଧ୍ୟମ କୌଣସି ତଥ୍ୟ ଦେଉନଥିଲା । ସେପଟେ ଦୁଇ ଦେଶର ସାମରିକ ସ୍ତରରେ କଥାବାର୍ତ୍ତା ଚାଲିଥିବା ବେଳେ ସୀମାରେ କିନ୍ତୁ କିଛି ବି ପରିବର୍ତ୍ତନ ଆସିନାହିଁ ।
ଉଭୟ ଦେଶ ହଜାରରୁ ଅଧିକ ସେନା ଉଭୟ ପଟେ ପହରା ଦେଉଛନ୍ତି । ଚୀନ୍ ସେନା ଅସ୍ତ୍ରଶସ୍ତ୍ର ଓ ଟ୍ୟାଙ୍କ ସହ ପ୍ରସ୍ତୁ ଥିବା ବେଳେ ଭାରତୀୟ ସେନାବି ଆଧୁନିକ ଯୁଦ୍ଧାସ୍ତ୍ର ସହ ପ୍ରସ୍ତୁତ ରହିଛି । ଦୁଇଦେଶ ମଧ୍ୟରେ ସାମରିକ ସ୍ତରରେ ଅନେକ ଥର କଥାବାର୍ତ୍ତା ହୋଇଥିଲେ ବି କୌଣସି ନିଷ୍କର୍ସ ବାହାରି ପାରିନାହିଁ । କେବଳ ଗଲୱାନ୍ରେ ନୁହେଁ ପାଙ୍ଗଗ୍ ହ୍ରଦ ନିକଟ ସୀମାରେ ମଧ୍ୟ ସମାନ ପରିସ୍ଥିତି ଲାଗି ରହିଛି । ଗ୍ରାଉଣ୍ଡରେ କିଛି ବି ପରିବର୍ତ୍ତନ ଆସିନଥିବା ଜଣେ ସେନା ଅଧିକାରୀ କହିଛନ୍ତି । ସେପଟେ କାନଡା ଟରୋଣ୍ଟରେ ମାନବାଧିକାର କର୍ମୀ ଚୀନ ବିରୋଧରେ ଆନ୍ଦୋଳନ କରିଛନ୍ତି।
ସେପଟେ ୩ ଦିନିଆ ରୁଷ ଗସ୍ତରେ ଅଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ମସ୍କୋରେ ଆୟୋଜିତ ବିଜୟ ଦିବସ ପରେଡରେ ରାଜନାଥ ଅଂଶଗ୍ରହଣ କରିବେ। ଦ୍ବିତୀୟ ବିଶ୍ଵଯୁଦ୍ଧରେ ଜର୍ମାନୀ ଉପରେ ସୋଭିଏଟ ରୁଷର ବିଜୟର ୭୫ ତମ ବର୍ଷ ଉପଲକ୍ଷେ ଏହି ପରେଡ୍ ଅନୁଷ୍ଠିତ ହେଉଛି। ଏହା ସହିତ ରାଜନାଥ ଭାରତ-ରୁଷର ପ୍ରତିରକ୍ଷା ଏବଂ ରଣନୀତି ଭାଗିଦାରିକୁ ଆହୁରି ମଜଭୁତ କରିବା ଲାଗି ଆଲୋଚନା କରିବେ। ଋଷ ଗସ୍ତ ବେଳେ ଖୁବ୍ ଶୀଘ୍ର ଭାରତକୁ ଏସ୍-୪୦୦ ମିସାଇଲ୍ ଡିଫେନ୍ସ ସିଷ୍ଟମ୍ ଡେଲିଭରୀ ପ୍ରଦାନ କରିବାକୁ ଦାବି କରିବେ ପ୍ରତିରକ୍ଷା ମନ୍ତ୍ରୀ । ଭାରତକୁ ଏହି ଡିଫେନ୍ସ ସିଷ୍ଟମ୍ ୨୦୨୧ ଡିସେମ୍ବର ଭିତରେ ମିଳିବାର ଥିଲା । ସେହିଭଳି ଭାରତ ଋଷ ଠାରୁ କିଣିଥିବା ବିଭିନ୍ନ ଯୁଦ୍ଧ ବିମାନର ସ୍ପେୟାର ପାର୍ଟସ୍ ଏବଂ ଅନ୍ୟାନ୍ୟ ଆବଶ୍ୟକ ସାମଗ୍ରୀ ଯୋଗାଇବା ସଂପ୍ରର୍କରେ କଥାବାର୍ତ୍ତା କରିବାର ସମ୍ଭାବନା ରହିଛି । ଭାରତ-ଚୀନ ସୀମା ବିବାଦ ଲାଗି ରହିଥିବାବେଳେ ରାଜନାଥଙ୍କ ରୁଷ ଗସ୍ତର ବେଶ୍ ଗୁରୁତ୍ଵ ରହିଛି।
ଭାରତ ଚୀନ୍ ମଧ୍ୟରେ ଲାଗିଥିବା ଉତ୍ତେଜନା ମଧ୍ୟରେ ଦେଶରେ ଚୀନ୍ ସାମଗ୍ରୀ ବର୍ଜନ ପାଇଁ ଦେଶରେ ଜୋରଦାରା ଅଭିଯାନ ଚାଲିଛି । ଅନେକ ସ୍ଥାନରେ ଲୋକେ ଚୀନ ସାମଗ୍ରୀ ବହିସ୍କାର କରୁଛନ୍ତି। ରାଜସ୍ଥାନ ଜୟପୁରର ବ୍ୟବସାୟୀମାନେ ରାଜା ପାର୍କ ଅଞ୍ଚଳରେ ୧୫ ହଜାରରୁ ଅଧିକ ପୋଷ୍ଟର ମାରି ଚୀନ ସାମଗ୍ରୀ ବର୍ଜନ କରିବାକୁ ଅଭିଯାନ ଆରମ୍ଭ କରିଛନ୍ତି । ଦୋକାନୀମାନେ କୌଣସି ଚୀନ୍ ନିର୍ମିତ ମୋବାଇଲ୍, ଚୀନ୍ ଜିନିଷପତ୍ରର ଦୋକାନାରେ ରଖିବେ ନାହିଁ କି ଏହାକୁ ପ୍ରଦର୍ଶନ କରିବେ ନାହିଁ ବୋଲି ସଂକଳ୍ପ କରିଛନ୍ତି।