Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଟ୍ରମ୍ପ ‘ଉଲ୍ଲୁ’ ଭଳି ‘ବୁଦ୍ଧିଆ’… ଆଙ୍କର ଟୋମି ଲାହେରନଙ୍କ ଭିଡିଓ ଭାଇରାଲ, ଭାରତୀୟଙ୍କୁ ଉଦବୋଧନ ବେଳେ ଟ୍ରମ୍ପଙ୍କ ଅନୁଗତ କହିଛନ୍ତି ଏମିତି..

25/08/2020 at 9:06 PM

ନ୍ୟୁୟର୍କ, ୨୫|୦୮:  ଆମେରିକାରେ କରୋନା ଭାଇରସର ଆତଙ୍କ ମଧ୍ୟରେ ରାଷ୍ଟ୍ରପତି ନିର୍ବାଚନ ପ୍ରଚାର ଜୋର୍ ଧରିବାରେ ଲାଗିଛି । ନିକଟରେ ଡେମୋକ୍ରାଟିକ୍‌ର କନଭେନସନ୍ ଶେଷ ହୋଇଛି । ଏପରିକି ରିପବ୍ଲିକାନର କନଭେନସନରେ ଡୋନାଲ୍ଡ ଟ୍ରମ୍ପଙ୍କୁ ପୁଣିଥରେ ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରାଯାଇଛି । ଏହା ମଧ୍ୟରେ ମଙ୍ଗଳବାର ଆମେରିକା ନିର୍ବାଚନ ସହ ଜଡିତ ଏକ ଭିଡିଓ ଭାଇରାଲ ହେବାରେ ଲାଗିଛି । ଯେଉଁଥିରେ ଆମେରିକା ଚ୍ୟାନେଲର ଆଙ୍କର ଡୋନାଲ୍ଡ ଟ୍ରମ୍ପଙ୍କ କ୍ୟାମ୍ପେନକୁ ନେଇ ଏକ ବୟାନ ଦେଇଛନ୍ତି ।

ଫକ୍ସ ନ୍ୟୁଜର ଆଙ୍କର ଟୋମି ଲାହେରନଙ୍କ ଏକ ଭିଡିଓ ଟ୍ୱିଟରରେ ଟ୍ରେଣ୍ଡ ହୋଇଛି । ଏଥିର ସେ ଟ୍ରମ୍ପଙ୍କ କ୍ୟାମ୍ପେନକୁ ନେଇ ଅନେକ କିଛି କହିଛନ୍ତି । ଏହାସହ ଭାରତରେ ନିଜ ପ୍ରଶଂସକଙ୍କୁ ସମ୍ବୋଧିତ କରି କହିଛନ୍ତି ଯେ, ଭାରତରେ ଥିବା ମୋର ସମସ୍ତ ପ୍ରଶଂସକଙ୍କୁ ନମସ୍କାର । ମେକ୍ ଆମେରିକା ଗ୍ରେଟ୍ ଏଗେନ ଏଜେଣ୍ଡାକୁ ସମର୍ଥନ କରିଥିବାରୁ ଧନ୍ୟବାଦ । ଟ୍ରମ୍ପଙ୍କ କ୍ୟାମ୍ପେନ ଆମେରିକାକୁ ମହାନ କରିବା ପାଇଁ ହୋଇଛି । କାରଣ ଟ୍ରମ୍ପ ପେଚା ଭଳି ବୁଦ୍ଧିମାନ । ଯାହାକୁ ହିନ୍ଦିରେ ଉଲ୍ଲୁ କୁହାଯାଏ ।

ସୂଚନାଯୋଗ୍ୟ, ଆମେରିକା ନିର୍ବାଚନରେ ସେଠାରେ ସ୍ଥାୟୀ ଭାବେ ରହୁଥିବା ପ୍ରବାସୀ ଭାରତୀୟଙ୍କ ବୋଟ୍ ଗୁରୁତ୍ୱପୂର୍ଣ୍ଣ । ଟ୍ରମ୍ପ ଲଗାତାର ଭାବେ ଭାରତୀୟ ଭୋଟରଙ୍କୁ ପ୍ରଲୋଭିତ କରିବାକୁ ଚେଷ୍ଟା କରୁଛନ୍ତି । ଫକ୍ସ ନ୍ୟୁଜ୍ ଟ୍ରମ୍ପଙ୍କୁ ସମର୍ଥନ କରୁଛି । ଏପରିକି ଖୁଲମଖୁଲା ଭାବେ ଟ୍ରମ୍ପଙ୍କୁ ପ୍ରଶଂସା ମଧ୍ୟ କରୁଛି ।

ଟୋମି ଲାହେରନ ଭିଡିଓରେ ଟ୍ରମ୍ପଙ୍କ ବୁଦ୍ଧିକୁ ପ୍ରଶଂସା କରୁଛନ୍ତି । କିନ୍ତୁ ଟ୍ୱିଟରରେ ଏହା ଉପରେ ମିମ୍ ହୋଇଗଲାଣି । କିଛି ୟୁଜର ଏକ ଉଲ୍ଲୁକୁ ରାଷ୍ଟ୍ରପତି କରାଯାଉ ବୋଲି ଲେଖିଛନ୍ତି ।

ତେବେ ଆମେରିକା ଭଳି ଦେଶରେ ପେଚାକୁ ଚାଲାକ ପକ୍ଷୀ ଭାବେ ବିବେଚନା କରାଯାଏ । ଗ୍ରୀକ୍ କଲଚର୍‌ରେ ମଧ୍ୟ ପେଚାକୁ ବୁଦ୍ଧିମାନ ପକ୍ଷୀ କୁହାଯାଏ । କିନ୍ତୁ ଭାରତୀୟ ଉଲ୍ଲୁ ଅର୍ଥ ବୋକା ।

   Related Posts