ନୂଆଦିଲ୍ଲୀ ୧୮/୦୪ : ପାକିସ୍ତାନୀ ଗୁଇନ୍ଦା ସଂସ୍ଥା ISI ପାଇଁ କାମ କରୁଥିବା ଜଣେ ଅଭିଯୁକ୍ତକୁ ଗିରଫ କରିଛି ଦିଲ୍ଲୀ ପୋଲିସର ସ୍ପେଶାଲ ସ୍କ୍ବାଡ୍ । ଗିରଫ ବ୍ୟକ୍ତିଜଣକ ପଞ୍ଜାବ ତରନ୍ତାରନ୍ ଅଞ୍ଚଳର ହରପାଲ ସିଂହ ବୋଲି ଜଣାପଡିଛି । ସେ ଭାରତ-ପାକ୍ ଅନ୍ତରାଷ୍ଟ୍ରୀୟ ସୀମାରେ ପାକିସ୍ତାନୀ ଗୁଇନ୍ଦା ସଂସ୍ଥା ISI ପାଇଁ କାମ କରୁଥିଲା । ହରପାଲ ନିକଟରୁ ଭାରତୀୟ ସେନାର ଗୁପ୍ତ ଦସ୍ତାବିଜ ଏବଂ ନକ୍ସା ଜବତ କରାଯାଇଛି ।
ମିଳିଥିବା ସୂଚନା ଅନୁସାରେ, ଅଭିଯୁକ୍ତ ହରପାଲ ସିଂହ କିଛି ଗୁପ୍ତ ତଥ୍ୟ ହାସଲ ପାଇଁ ଦିଲ୍ଲୀ ଆସିଥିଲା । ISI ପାଇଁ କାମ କରୁଥିବା ଆଉଜଣେ ଗୁପ୍ତଚରକୁ ଦିଲ୍ଲୀରେ ଭେଟି ଭାରତୀୟ ସେନାର କିଛି ଗୁପ୍ତ ତଥ୍ୟ ଏବଂ ଗୋପନୀୟ ଦସ୍ତାବିଜ ଦେବାର ଥିଲା । କିନ୍ତୁ ଗୁଇନ୍ଦା ତଥ୍ୟ ଆଧାରରେ ଅଭିଯୁକ୍ତକୁ ଧରିବାରେ ସକ୍ଷମ ହୋଇଛି ଦିଲ୍ଲୀ ପୋଲିସର ସ୍ପେଶାଲ ସ୍କ୍ବାଡ୍ ।
ଅଭିଯୁକ୍ତ ହରପାଲ ସିଂହ ଅନେକଗୁଡିଏ ଏଜେନ୍ସିର ରାଡାର୍ ମଧ୍ୟରେ ଥିଲା । ତାକୁ ଅଫିସିଆଲ ସିକ୍ରେଟ୍ ଆକ୍ଟ୍ (OSA) ଆଧାରରେ ଗିରଫ କରାଯାଇଥିବା ଦିଲ୍ଲୀ ପୋଲିସର ଜଣେ ବରିଷ୍ଠ ଅଧିକାରୀ କହିଛନ୍ତି । ଅଭିଯୁକ୍ତକୁ ଗିରଫ କରି କୋର୍ଟରେ ହାଜର କରିବା ସହିତ ରିମାଣ୍ଡ ପାଇଁ ଆବେଦନ କରିଛି ପୋଲିସ ।
{"width":837,"height":558}
