ନୂଆଦିଲ୍ଲୀ,୨୬|୧୧: ଆଉ କିଛି ଦିନ ପରେ ଆରମ୍ଭ ହୋଇଯିବ ବିବାହ ଋତୁ । ଭାରତ ହିଁ ଏକମାତ୍ର ଦେଶ ଯେଉଁଠାରେ ବିବାହ ଏକ ଉତ୍ସବ ଭଳି ହୋଇଥାଏ । କରୋନା ମହାମାରୀକୁ ନଜରରେ ରଖି ସରକାର ବିବାହ କାର୍ଯ୍ୟକ୍ରମ ଉପରେ କିଛି କଟକଣା ଲଗାଇଛନ୍ତି । ଗାଇଡଲାଇନ୍ ଅନୁସାରେ ବିହାହ ଭୋଜିରେ ସର୍ବାଧିକ ୨୦୦ଜଣ ସାମିଲ ହୋଇପାରିବେ । ତେବେ ଦିଲ୍ଲୀରେ କରୋନା ସଂକ୍ରମଣ ବୃଦ୍ଧି ପାଇବା କାରଣରୁ ସରକାର ବିବାହ ଭୋଜିରେ କେବଳ ୫୦ଜଣ ସାମିଲ ହୋଇପାରିବେ ବୋଲି ଗାଇଡଲାଇନ୍ ଜାରି କରିଛନ୍ତି । ଭିଡିଓଗ୍ରାଫର ଓ ଫଟୋଗ୍ରାଫରଙ୍କୁ ମଧ୍ୟ ଅତିଥି ଭାବେ ଗଣତି କରାଯିବ । କେବଳ କ୍ୟାଟରିଂ କର୍ମଚାରୀ ଏଥିରୁ ବାଦ୍ ପଡିବେ ।
ବିବାହ ଭୋଜିରେ କେତେ ଅତିଥି ଯୋଗ ଦେଉଛନ୍ତି ଏହା ଉପରେ ନଜର ରଖିବା ପାଇଁ ଦିଲ୍ଲୀ ସରକାର ବିଭିନ୍ନ ଟିମ୍ ଗଠନ କରିଛନ୍ତି । ଯଦି ବିବାହ କାର୍ଯ୍ୟକ୍ରମରେ ୧୦୦ରୁ ଅଧିକ ଲୋକ ସାମିଲ ହୁଅନ୍ତି ତେବେ ୨୫ ହଜାର ଟଙ୍କା ଜରିମାନା ଲାଗିବ । ଏହାସହ ମହାମାରୀ ଗାଇଡଲାଇନ୍ ଉଲଙ୍ଘନ କଲେ ମାନବ ଜୀବନକୁ ବିପଦରେ ପକାଇବା ଆଧାରରରେ ମୋକଦ୍ଦମା ଚାଲିବ ।ଏଥିପାଇଁ ସମସ୍ତ ମାଜିଷ୍ଟ୍ରେଟ୍ ଓ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।
ମେରୁଟରେ ପ୍ରଥମ ଏଫଆଇଆର
ଉତ୍ତର ପ୍ରଦେଶର ମେରୁଟରେ କୋଭିଡ୍-୧୯ ନିୟମ ନପାଳିବା ମହଙ୍ଗା ପଡିଛି । ସାମାଜିକ ଦୂରତା ଉଲଙ୍ଘନରେ ବର-କନ୍ୟାଙ୍କ ପିତା ଓ ଗେଷ୍ଟ ହାଉସ୍ ମାଲିକଙ୍କ ନାଁରେ ମଧ୍ୟ ମାମଲା ରୁଜୁ ହୋଇଛି । କାରଣ ଏହି ବିବାହ କାର୍ଯ୍ୟକ୍ରମରେ ୩୦୦ରୁ ୩୫୦ ଲୋକ ଉପସ୍ଥିତ ଥିଲେ ।
କଣ କହୁଛି ନିୟମ
ଭୋଜିରେ ୧୦୦ରୁ ଅଧିକ ଲୋକ ଉପସ୍ଥିର ରହିବା ଅନୁଚିତ୍
ଗେଟରେ ଥର୍ମାଲ ସ୍କ୍ରିନିଂରେ ଅତିଥିଙ୍କ ତାପମାତ୍ରା ମପାଯିବ
ଗେଟରେ ସାନିଟାଇଜର୍ ଓ ହ୍ୟାଣ୍ଡଓ୍ୱାଶର ବ୍ୟବସ୍ଥା
ଭୋଜିର ଭିଡିଓ ଉତ୍ତୋଳନ କରାଯିବ, ଯେଉଁଥିରେ କେତେ ଅତିଥି ଆସିଛନ୍ତ ତାହା ଜାଣିହେବ
ମାସ୍କ ପିନ୍ଧିବା ବାଧ୍ୟତାମୂଳକ
ଆବଶ୍ୟକ ପଡିଲେ ପ୍ରଶାସନ କରିପାରେ ଭିଡିଓଗ୍ରାଫି