Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଚରିତ୍ରକୁ ସଂଦେହ କରି ସ୍ତ୍ରୀର ମୁଣ୍ଡ ଗଣ୍ଡି ଅଲଗା କରିବା ସହ କଟା ମୁଣ୍ଡ ଧରି ସ୍ବାମୀ ଥାନାରେ ପହଞ୍ଚିବା ଘଟଣା: ମୃତ ମହିଳାଙ୍କ ଭାଇ କଲେ ଅଭିଯୋଗ, ଯୌତୁକ ପାଇଁ କରାଯାଇଛି ହତ୍ୟା

26/08/2019 at 12:42 PM

ଅସ୍ତରଙ୍ଗ୨୬|୮: ଚରିତ୍ର ସଂଦେହରେ ସ୍ତ୍ରୀର ମୁଣ୍ଡ ଓ ଗଣ୍ଡି ଅଲଗା କରିଦେବା ସହ ସ୍ତ୍ରୀର କଟା ମୁଣ୍ଡକୁ ଧରି ସ୍ବାମୀ ଥାନାରେ ପହଞ୍ଚିବା ଘଟଣାରେ ନୂଆ ମୋଡ ଆସିଛି । ସ୍ତ୍ରୀର ଚରିତ୍ରକୁ ସନ୍ଦେହ କରି ନୁହେଁ, ବରଂ ଯୌତୁକ ପାଇଁ ଅନ୍ନପୂର୍ଣ୍ଣାଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ମୃତ ମହିଳାଙ୍କ ଭାଇ ପ୍ରଶାନ୍ତ କୁମାର ସାହୁ ଅସ୍ତରଙ୍ଗ ଥାନାରେ ଏ ନେଇ ବିଧିବଦ୍ଧଭାବେ ଲିଖିତ ଅଭିଯୋଗ କରିଛନ୍ତି । 

ପୋଲିସ ନିକଟରେ ଦାଖଲ ଲିଖିତ ଅଭିଯୋଗରେ ସେ କହିଛନ୍ତି ଯେ, ୮ ବର୍ଷ ତଳେ ଅସ୍ତରଙ୍ଗ ଥାନା ଅନ୍ତର୍ଗତ ରାଇବେରୁଅଁ ଗାଁର ହାଡିବନ୍ଧୁଙ୍କ ପୁଅ ଗଣେଶ ବେହେରାଙ୍କ ସହ ତାଙ୍କ ଭଉଣୀ ଅନ୍ନପୂର୍ଣ୍ଣାଙ୍କ ବିବାହ ହୋଇଥିଲା । ବିବାହର ୫-୬ମାସ ପରଠୁ ଦେଢ ଲକ୍ଷ ଟଙ୍କା ଯୌତୂକ ଆଣିବା ପାଇଁ ଅନ୍ନପୂର୍ଣ୍ମାଙ୍କ ଉପରେ ସ୍ବାମୀ ଗଣେଶ ବେହୁା, ଶ୍ବଶୂର ହାଡିବନ୍ଧୁ ବେହୁରା, ଶାଶୂ, ୨ ଦେଢଶୁର ଏବଂ ଯାଆମାନେ ଚାପ ପକାଇ ଆସୁଥିଲେ ଓ ଏଥିପାଇଁ ନିର୍ଯ୍ୟାତନା ମଧ୍ୟ ଦେଇ ଆସୁଥିଲେ । ତେବେ ଅନ୍ନପୂର୍ଣ୍ଣା ସବୁ ସହିଯାଉଥିଲେ । ବାପ ଘରକୁ ଅସୁବିଧାରେ ପକାଇବାକୁ ଚାହୁଁ ନଥିଲେ ।

 ବିବାହର ୭ ବର୍ଷ ପରେ ଏକ ପୁତ୍ର ସନ୍ତାନର ଜନ୍ମ ହୋଇଥିଲା । ଏହି ସନ୍ତାନକୁ ଏବେ ବର୍ଷେ ୫ମାସ ହୋଇଛି । ତେବେ ପୁତ୍ର ସନ୍ତାନ ଜନ୍ମ ହେବାପରେ ନିର୍ଯ୍ୟାତନା ଆହୁରି ବଢଯାଇଥିଲା । ଏଥିପାଇଁ ଗତ କିଛିଦିନ ତଳେ ଅନ୍ନପୂର୍ଣ୍ଣା ନିଜ ବାପ ଘରକୁ ଚାଲିଯାଇଥିଲେ ।

ଅଗଷ୍ଟ ୧୯ତାରିଖ ଦିନ ଉଭୟ ପରିବାର ଭଦ୍ରଲୋକଙ୍କ ଉପସ୍ଥିତିରେ ସଭା କରି ଘଟଣାର ସମାଧାନ ପାଇଁ ଉଦ୍ୟମ କରିଥିଲେ । ସଭାର ନିଷ୍ପତ୍ତି ଅନୁସାରେ ୨୧ ତାରିଖଦିନ ପ୍ରଶାନ୍ତ ନିଜ ଭଉଣୀ ଅନ୍ନପୂର୍ଣ୍ଣାଙ୍କୁ ଶ୍ବଶୁର ଘରେ ଛାଡି ଆସିଥିଲେ । ତେବେ ଗତକାଲି ଅର୍ଥାତ ରବିବାର ରାତି ୧୧ଟା ୫ମିନିଟରେ ସ୍ବାମୀ, ଶ୍ବଶୁର, ଶାଶୂ, ଦେଢଶୁର ଓ ଯାଆମାନେ ମିଶି ତାଙ୍କ ଉପରେ ସଂଘବଦ୍ଧ ଭାବେ ଆକ୍ରମଣ କରି ଗଣ୍ଡି ମୁଣ୍ଡ ଅଲଗା କରିଦେଇଥିଲେ ବୋଲି ଅଭିଯୋଗ କରିଛନ୍ତି ।

ସୂଚନାଯୋଗ୍ୟ ଯେ, ଅନ୍ନପୂର୍ଣ୍ଣାଙ୍କ ସ୍ବାମୀ ଗଣେଶ ବେହୁରା ଗତକାଲି ସ୍ତ୍ରୀକୁ ହତ୍ୟା କରିବା ପରେ କଟାମୁଣ୍ଡ ଧରି ଅସ୍ତରଙ୍ଗ ଥାନାରେ ପହଞ୍ଚିଥିଲେ । ଏହା ସମସ୍ତଙ୍କୁ ଚକିତ କରିଦେଇଥିଲା । ସ୍ତ୍ରୀ ପରପୁରୁଷ ସହ ସମ୍ପର୍କ ରଖୁଥିଲା ସେଥିପାଇଁ ସେ ତାର ବେକ କାଟି ଦେଇଛି ବୋଲି ପୋଲିସକୁ କହିଥିଲା ଗଣେଶ । ପୋଲିସ କଟା ମୁଣ୍ଡ ଜବତ କରିବା ସହ ଗଣେଶକୁ ଅଟକ ରଖି ତଦନ୍ତ ଚଳାଇଛି । ଅଭିଯୁକ୍ତ ଗଣେଶ ଏହି ହତ୍ୟାକାଣ୍ଡ ଘଟାଇଥିବା ପୋଲିସ ଆଗରେ ସ୍ବୀକାର କରିଛି । ପୋଲିସ ଗଣେଶକୁ ଅଟକ ରଖି ଘଟଣାର ଦନ୍ତ ଚଳାଇଛି । ଅନ୍ୟ ପକ୍ଷରେ ଅଭିଯୁକ୍ତ ଗଣେଶର ପରିବାର ଲୋକେ ଫେରାର ହୋଇଯାଇଛନ୍ତି ।  

ଖବର ନେବାରେ ଜଣାପଡିଛି ଯେ, ଅଭିଯୁକ୍ତ ଗଣେଶ ଚେନ୍ନାଇରେ କିଛି ବ୍ୟବସାୟ କରୁଥିଲା । ସାଙ୍ଗରେ ସ୍ତ୍ରୀ ଅନ୍ନପୂର୍ଣ୍ଣା ମଧ୍ୟ ରହୁଥିଲେ । ତେବେ କିଛିଦିନ ହେଲା ଉଭୟ ଚେନ୍ନାଇରୁ ଗାଁ କୁ ଫେରିଆସିଥିଲେ । ଗାଁରେ ରହୁଥିବାବେଳେ ସେମାନଙ୍କ ମଧ୍ୟରେ ପ୍ରତ୍ୟେକ ଦିନ କଳି ଝଗଡା ଓ ମାର ପିଟ ହୋଇଆସୁଥିଲା ।

ମୁଖ୍ୟତଃ ଅନ୍ନପୂର୍ଣ୍ଣାଙ୍କ ଚରିତ୍ରକୁ କେନ୍ଦ୍ର କରି ଏଭଳି ଅଶାନ୍ତି ଲାଗି ରହିଥିଲା ବୋଲି ଅଭିଯୁକ୍ତ ଗଣେଶ ପୋଲିସକୁ କହିଛି ।  ସ୍ତ୍ରୀର ଚରିତ୍ରକୁ ସନ୍ଦେହ କରିବା ଗତକାଲି ରାତିରେ ବିସ୍ଫୋରକ ରୂପ ନେଇଥିଲା । ଗଣେଶ ଏକ ଧାରୁଆ ଅସ୍ତ୍ରରେ ଆକ୍ରମଣ କରି ଅନ୍ନପୂର୍ଣ୍ଣାଙ୍କ ଗଣ୍ଡିମୁଣ୍ଡ ଅଲଗା କରିଦେଇଥିଲା । କେବଳ ସେତିକି ନୁହେଁ କଟାମୁଣ୍ଡକୁ ଏକ ବ୍ୟାଗରେ ପୂରାଇ ସାଇକଲ ଯୋଗେ ଦୀର୍ଘ ୮କିଲୋମିଟର ଦୂରରେ ଥିବା ଅସ୍ତରଙ୍ଗ ଥାନାରେ ପହଞ୍ଚିଥିଲା ।

ଥାନା ବାରଣ୍ଡାରେ କଟା ମୁଣ୍ଡଥିବା ବ୍ୟାଗଟିକୁ ରଖି ଦେଇ ଗଣେଶ ନିକଟସ୍ଥ ଏକ ନଳକୂଅରେ ଧୁଆ ଧୁଇ ହୋଇଥିଲା । କାରଣ ଗଣେଶର ଦେହ ସାରା ରକ୍ତ ଛିଟା ଲାଗିଥିଲା । ଏତିକି ବେଳେ ପୋଲିସ ପଚାରିଥିଲେ ଯେ, ଘଟଣା କଣ ଓ ସେ ବେଗରେ କଣ ରଖିଛି । ଗଣେଶ କହିଥିଲା ଯେ, ଆଜି ତାକୁ ଶାନ୍ତି ମିଳିଲା ଓ ସେ ନ୍ୟାୟ ପାଇଛି ।  ତାପରେ ସେ ପୋଲିସକୁ ବ୍ୟାଗରେ ଥିବା କଟା ମୁଣ୍ଡ ଦେଖାଇଥିଲା । ପୋଲିସ ଏହା ଦେଖି ଚମକି ପଡିଥିଲା । ଗଣେଶ ଠାରୁ କଟା ମୁଣ୍ଡଟି ଜବତ କରିବା ସହ ଗଣେଶକୁ ଅଟକ ରଖିଥିଲା ।

ଅନ୍ନପୂର୍ଣ୍ଣାଙ୍କ ଭାଇ ପ୍ରଶାନ୍ତଙ୍କ ଅଭିଯୋଗ ଆଧାରରେ ଆଜି ପୋଲିସ ସାଇଣ୍ଟିଫିକ ଟିମ ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଘଟଣା ପ୍ରଚାରିତ ହେବାପରେ ଅଭିଯୁକ୍ତ ଗଣେଶର ଘର ଆଗରେ ଶହ ଶହ ଲୋକ ରୁଣ୍ଡ ହୋଇଛନ୍ତି । ସମଗ୍ର ଅଞ୍ଚଳ ସ୍ତବ୍ଜ ହୋଇଯାଇଛି ।

   Related Posts