ଭୁବନେଶ୍ବର ୧୧|୧୧: ବିଜୁ ସମତା କ୍ରାନ୍ତି ଦଳ ଗଠନ ନେଇ ଉଠିଲାଣି ସନ୍ଦେହ । ବ୍ରଜକିଶୋର ତ୍ରିପାଠୀଙ୍କ ନେତୃତ୍ବାଧୀନ ସମତା କ୍ରାନ୍ତି ଦଳ ସହ ଡାକ୍ତର ଦାମଦୋର ରାଉତ ମିଶି ପାରନ୍ତି । ବିଜୁଙ୍କ ନାଁ ସମତାକ୍ରାନ୍ତି ଦଳରେ କେମିତି ଯୋଡ଼ି ହେବ ସେନେଇ ଏପର୍ଯ୍ୟନ୍ତ ଅଙ୍କ ଛିଡୁନି।  ଏପଟେ ଦାମଙ୍କ ପାର୍ଟି ଅନ୍ୟ ଦଳ ପରି ଅସ୍ତିତ୍ବ ହରାଇବ ବୋଲି ବିଜେଡି ନେତା କହିଛନ୍ତି । କିନ୍ତୁ କଂଗ୍ରେସ ବିଜେଡି ଭୋଟ ମାଇନସ ଆଶାରେ ସ୍ବାଗତ କରିଥିବା ବେଳେ ବିଜେପି କହିଛି କିଛି ଫରକ ପଡିବନି… ଦାମ ଘୋଷଣା କରିଦେଲେ ଗଢ଼ିବେ  ବିଜୁ ସମତା କ୍ରାନ୍ତି ଦଳ। ଏବେ କିନ୍ତୁ ଥ-ଥ-ମ-ମ ହେଲେଣି ଦାମ । କାରଣ ସମତା​‌ କ୍ରାନ୍ତି ଦଳରେ ବିଜୁ ନାଁ ଯୋଡ଼ି ହେବ କି ନାହିଁ ସେଥିରେ ସନ୍ଦେହ ଉପୁଜିଛି। ସମତା କ୍ରାନ୍ତି ସାଧରଣ ପରିଷଦ ବୈଠକରେ ବି ଏ ବାବଦ ନିଷ୍ପତି ହୋଇନି । ସେହିପରି ନିର୍ବାଚନ କମିଶନଙ୍କ ପାଖରେ ମଧ୍ୟ ଆଇନ୍ ଗତ ସମସ୍ୟା ସୃ୍ଷ୍ଟି ହୋଇପାରେ ।  ତେବେ ଦାମ କହିଛନ୍ତି ବିଜୁ ଜନତାଦଳରୁ ଆଘାତ ପାଇଥିବା ବିଜୁ ଅନୁଗତ ତାଙ୍କ ସାଙ୍ଗରେ ମିଶିବେ । ସେନେଇ ଆଲୋଚନା ଜାରି ରହିଛି। ଏପଟେ ବ୍ରଜ ତ୍ରିପାଠୀ ବିଜେଡି ବିରୋଧରେ ମହାଗଠବନ୍ଧନ ନେଇ ଇସାରା ଦେଇଛନ୍ତି । ଦାମଙ୍କ ନୂଆ ଦଳ ଘୋଷଣାକୁ ନେଇ ବିଜେଡି ବିବ୍ରତ ନୁହେଁ । ହେବ ବା କେମିତି। ଦାମଙ୍କ କଟ୍ଟର ବିରୋଧୀ ଦେବାଶିଷ ସାମନ୍ତରାୟ କହିଛନ୍ତି ୨୦୦୦ ମସିହାରୁ ଏମିତି ଅନେକ ପରୀକ୍ଷା ଫେଲ ମାରିଛି। ବିଜୟ, ପ୍ୟାରୀଙ୍କ ଉଦାହରଣ ଦେଇଛନ୍ତି।  ଦାମ ବାବୁ ବି ଅସ୍ଥିତ୍ବ ହରାଇବେ ବୋଲି କହିଛନ୍ତି ଦେବାଶିଷ । ଏପଟେ କଂଗ୍ରେସ ବିଜେଡିର ଭୋଟ ମାଇନସ ହେବା ଆଶାରେ ଦାମଙ୍କ ନୂଆ ଦଳକୁ  ସ୍ବାଗତ କରିଛି। ବିଜୁ ଜନତା ଦଳରୁ ବାହାରିବା ପରେ  ବିଜୟ ମହାପାତ୍ର,  ପ୍ୟାରୀମୋହନ ମହାପାତ୍ର, ବ୍ରଦ ତ୍ରିପାଠୀ ବି ବିଜେଡିକୁ ଟକ୍କର ଦେବା ପାଇଁ ଦଳ ଗଢ଼ିଥିଲେ । ସମସ୍ତେ ଅସ୍ଥିତ୍ବ ହରାଇଛନ୍ତି ଏବେ ଦାମ ବାବୁ ବିଜୁ ଅନୁଗତଙ୍କୁ ଏକାଠି କରି ଦଳ ଗଢ଼ିବାର ହୁଂକାର ଦେଇଛନ୍ତି। ଯାହାର ପରୀକ୍ଷାଫଳ ୧୯ରେ ଜଣା ପଡ଼ିବ।