ଚେନ୍ନାଇ ୧୬/୧୧ : ଗଜର ତାଣ୍ଡବ ।
ତାମିଲନାଡୁ ଉପକୂଳରେ ତାଣ୍ଡବ ରଚାଇଛି ସାମୁଦ୍ରିକ ଝଡ଼ ' ଗଜ '। ସିଭିଅର ସାଇକ୍ଲୋନ୍ ଗଜ ଯୋଗୁଁ ଏବେ ସୁଦ୍ଧା ୨୦ ଜଣ ପ୍ରାଣ ହରାଇଲେଣି । ଗଜର ସର୍ବାଧିକ ପ୍ରଭାବ ପଡିଛି ପଡିଛି ନାଗପଟ୍ଟିନମରେ । ଆଜି ସକାଳେ ତାମିଲନାଡୁ ଏବଂ ପୁଡୁଚେରୀ ଉପକୂଳ ମଧ୍ୟରେ ଅତିକ୍ରମ କରିଛି ଗଜ । ପ୍ରଭାବରେ ତାମିଲନାଡୁ ଓ କେରଳରେ ପ୍ରବଳ ବର୍ଷା ପବନ ହୋଇଛି ।
ତାମିଲନାଡୁ ଉପକୂଳରେ ସିଭିଅର ସାଇକ୍ଲୋନିକ୍ ଷ୍ଟର୍ମ ଗଜ ତାଣ୍ଡବ ରଚାଇଛି । ଦେଖନ୍ତୁ ଏହି ଦୃଶ୍ୟ, ବିଭତ୍ସ, ପ୍ରକୃତିର ତାଣ୍ଡବଲୀଳାର ଦୃଶ୍ୟ । ଆଜି ଭୋର୍ ସାଢେ ୩ଟାରେ ତାମିଲନାଡୁର ନାଗପଟ୍ଟିନମଠାରେ ସ୍ଥଳ ଭାଗ ଛୁଇଁଥିଲା ଗଜ । ଲ୍ୟାଣ୍ଡଫଲ୍ ସମୟରେ ପବନର ଘଣ୍ଟାପ୍ରତି ବେଗ ୧୦୦ରୁ ୧୧୦ କିଲୋମିଟର ଥିଲା । ପ୍ରବଳରୁ ଅତି ପ୍ରବଳ ମାତ୍ରାରେ ବର୍ଷା ହୋଇଥିଲା । ଫଳରେ ରାଜ୍ୟର ନାଗା ପଟ୍ଟିନମ. କୁଡ୍ଡାଲୋର, ଥୋଣ୍ଡି ଓ ପାମ୍ବାନରେ ବ୍ୟାପକ କ୍ଷୟକ୍ଷତି ହୋଇଛି । ବଡବଡ ଗଛ ଉୁପୁଡ଼ି ପଡ଼ିଛି । ରାସ୍ତା ଅବରୋଧ ହୋଇଯାଇଛି । ଅନେକ ଅଞ୍ଚଳକୁ ବିଦ୍ୟୁତ ସରବରାହ ବନ୍ଦ ରହିଛି । ପାଖାପାଖି ୮୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି, ୬ଟି ଉପକୂଳବର୍ତ୍ତୀ ଜିଲ୍ଲାରେ ସ୍କୁଲ ଏବଂ କଲେଜ ବନ୍ଦ କରାଯାଇଛି। ରିଲିଫ୍ କ୍ୟାମ୍ପ ଖୋଲାଯାଇଛି। ଏନଡିଆରଏଫ୍, ଏସ୍ଡିଆରଏଫ୍ ଉଦ୍ଧାର କାର୍ଯ୍ୟରେ ଲାଗିଛନ୍ତି । କେନ୍ଦ୍ର ଗୃହ ମନ୍ତ୍ରୀ ରାଜନାଥ ସିଂ ତାମିଲନାଡୁ ମୁଖ୍ୟମନ୍ତ୍ରୀ ପାଲାନିସ୍ବାମୀଙ୍କ ସହ କଥା ହୋଇଛନ୍ତି । ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ଓ ଗୁରୁତର ଆହତଙ୍କ ପାଇଁ ଏକ ଲକ୍ଷ ଟଙ୍କା କ୍ଷତିପୂରଣ ଘୋଷଣା କରିଛନ୍ତି ରାଜ୍ୟ ସରକାର ।
ସେପଟେ ଗଜ ସ୍ଥଳଭାଗରେ ହିଟ୍ କରିବା ପରେ ଏହା ଡିପ୍ ଡିପ୍ରେସନରେ ପରିଣତ ହୋଇଛି । ଆସନ୍ତା ୨୪ ଘଣ୍ଟା ମଧ୍ୟରେ ଏହା ଲଘୁଚାପ ହୋଇ କ୍ରମଶ ଦୁର୍ବଳ ହେବ।ଏବେ ଏହା କେରଳ ଅଭିମୁଖେ ଅଗ୍ରସର ହେଉଛି।
