ନୂଆଦିଲ୍ଲୀ ୨୪/୧୧ : ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ମଙ୍ଗଳବାର ଦିନ ବାତ୍ୟାର ରୂପ ନେଇଛି। ବାତ୍ୟା ନିଭାର୍ ଚଳିତ ବର୍ଷର ଚତୁର୍ଥ ବାତ୍ୟା। ଏହାପୂର୍ବରୁ ଅମ୍ପାନ, ନିଃସର୍ଗ ଓ ଗତି ଆସିଥିଲା। ବର୍ତ୍ତମାନ ସମସ୍ତଙ୍କ ନଜର ନିଭାର୍ ଉପରେ ରହିଛି। ତାମିଲନାଡୁ ଓ ପୁଦୁଚେରୀ ବର୍ଷା ଆରମ୍ଭ ହୋଇଯାଇଛି। ଚେନ୍ନାଇରେ ଆଜି ଲଗାତାର ବର୍ଷା ହେଉଛି। ପାଣିପାଗ ବିଭାଗ ସୂଚନା ଅନୁଯାୟୀ, ମଙ୍ଗଳବାର ଦିନ ଆହୁରି ଭୀଷଣ ବର୍ଷା ହେବ। ବର୍ତ୍ତମାନ ପବନର ବେଗ ଘଣ୍ଟା ପ୍ରତି ୧୦୦ ରୁ ୨୦୦ କିଲୋମିଟର ରହିପାରେ। ତାମିଲନାଡୁ ଓ ପୁଦୁଚେରୀର ଅନେକ ଅଞ୍ଚଳରେ ଆଲର୍ଟ ଜାରି କରାଯାଇଛି। ନାବିକ ଓ ମାଛ ଧରାଳିଙ୍କୁ ସମୁଦ୍ରକୁ ନ ଯିବାକୁ ନିର୍ଦ୍ଦେଶ ଦିଆଯାଇଛି।
ବଙ୍ଗୋପସାଗରରେ ସୃଷ୍ଟି ହୋଇଥିବା ଏହି ଝଡ ଲଗାତାର ଆଗକୁ ବଢିଚାଲିଛି। ଝଡ ବର୍ତ୍ତମାନ ପୁଦୁଚେରୀରୁ ୪୧୦ କିଲୋମିଟର ଦକ୍ଷିଣରେ ରହିଛି। ଚେନ୍ନାଇରୁ ଦକ୍ଷିଣ-ପୂର୍ବରୁ ୪୫୦ କିଲୋମିଟର ଦୂରରେ ରହିଛି। ବାତ୍ୟା ଉତ୍ତର-ପଶ୍ଚିମ ଦେଇ ତାମିଲନାଡୁ ଆଡକୁ ଗତି କରିବ।
ଚେନ୍ନାଇରେ ସୋମବାର ସନ୍ଧ୍ୟାରୁ ବର୍ଷା ଜାରି ରହିଛି। ଏବେ ସୁଦ୍ଧା ୭୧ ମିଲିମିଟର ବର୍ଷା ରେକର୍ଡ କରାଯଇଛି। ତାମିଲନାଡୁ, କେରଳ, ତେଲେଙ୍ଗାନା ଓ ଓଡିଶାର ଅନେକ ଅଞ୍ଚଳରେ ହାଲୁକା ବର୍ଷା ହେବାର ସମ୍ଭାବନା ରହିଛି। ତାମିଲନାଡୁରେ ରିଲିଫ ଏବଂ ଉଦ୍ଧାର କାର୍ଯ୍ୟ ପାଇଁ ଜାତୀୟ ବିପର୍ଯ୍ୟୟ ବିଭାଗର ୬ଟି ଟିମ୍ ନିୟୋଜିତ କରାଯାଇଛି।
