ବରଗଡ ୨୭।୦୫: ବରଗଡ଼ ଜିଲାରେ ସାଇବର୍ କ୍ରାଇମରେ ଅପରାଧୀମାନେ ସକ୍ରିୟ ହୋଇପଡିଛନ୍ତି । ଅପରାଧୀମାନେ ଖୋଦ ବରଗଡ଼ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ଏବଂ ଏସ୍ପି ପଦ୍ମିନୀ ସାହୁଙ୍କ ନାମରେ ଫେକ୍ ଫେସବୁକ ଆକାଉଣ୍ଟ ଖୋଲିବା ପୋଲିସ ପ୍ରଶାସନ ପାଇଁ ଚ୍ୟାଲେଞ୍ଜ ହୋଇପଡିଛି । ଜିଲ୍ଲାପାଳଙ୍କ ନାମରେ ଖୋଲାଯାଇଥିବା ଫେକ୍ ଫେସବୁକ ଆକାଉଣ୍ଟରେ ଜିଲ୍ଲାପାଳ ଏବଂ ତାଙ୍କ ଅଫିସର ଏକ ଫଟୋ ଦିଆଯାଇଛି ।
ସେହିପରି ଏସ୍ପିଙ୍କ ନାମରେ ଖୋଲାଯାଇଥିବା ଫେକ୍ ଫେସବୁକ ଆକାଉଣ୍ଟରେ ଏସ୍ପି ସାହୁଙ୍କ ଫଟୋ ସହିତ ଏସପିଙ୍କ କାର୍ଯ୍ୟାଳୟର ଏକ ମ୍ୟପ୍କୁ ଦିଆଯାଇଛି । ଏଭଳି ଭାବେ ଫେକ୍ ଫେସବୁକ ଆକାଉଣ୍ଟ ଖୋଲି ସମ୍ପୃକ୍ତ ଅପରାଧୀମାନେ ଅନେକଙ୍କ ପାଖକୁ ଫ୍ରେଣ୍ଡ ରିକ୍ୟୁଏଷ୍ଟ ପଠାଇବା ପରେ କିଛି ଲୋକ ତାହା ଫେକ୍ ଆକାଉଣ୍ଟ ବୋଲି ଜାଣି ନ ପାରି ତାହା ଗ୍ରହଣ ମଧ୍ୟ କରୁଛନ୍ତି । ତେବେ ଏହା ଜାଲିଆତି ବୋଲି ଜାଣିବା ପରେ ଲୋକେ ସେହି ଫେସବୁକ ଆକାଉଣ୍ଟରୁ ଅନଫ୍ରେଣ୍ଡ ହେବା ସହିତ ବ୍ଲକ କରୁଥିବା ସୂଚନା ମିଳିଛି। ବରଗଡ଼ ଟାଉନ ଥାନାରେ ଏନେଇ ଏକ ମାମଲା (ନଂ-୧୮୭/୨୦୨୦) ରୁଜୁ କରାଯାଇଛି। ଏଥିସହ ଏହାର ଅଧିକ ତଦନ୍ତ ଜାରି ରହିଛି ବୋଲି ଟାଉନ ଥାନା ଆଇଆଇସି ସଦାନନ୍ଦ ପୂଜାହାରୀ କହିଛନ୍ତି।