ଭୁବନେଶ୍ୱର ୩।୮: ଓଡିଶା ମେଡିକାଲ ଏବଂ ହେଲଥ୍ ସର୍ଭିସ (ଓଏମଏଚଏସ୍) କ୍ୟାଡରରେ ରାଜ୍ୟ ସରକାର ୨ହଜାର ଏଲଟିଆରଏମଓ ଡାକ୍ତରୀ ପଦବୀ ସୃଷ୍ଟି କରିଛନ୍ତି। ଗୃପ-ଏ କନିଷ୍ଠ ଶାଖାରେ ଏହି ପଦବୀ ସୃଷ୍ଟି ହୋଇଥିବା ନେଇ କମିଶନର ତଥା ସଚିବ ଡା. ପ୍ରମୋଦ କୁମାର ମେହେର୍ଦ୍ଦା ତାଙ୍କ ୩ ଅଗଷ୍ଟ ପତ୍ର ସଂଖ୍ୟା ୧୯୫୪୭ରେ ମହାଲେଖ ଅଧିକ୍ଷକଙ୍କୁ ସୂଚିତ କରିଛନ୍ତି। ଏ ନେଇ ପ୍ରସ୍ତାବକୁ ରାଜ୍ୟପାଳଙ୍କ ସ୍ବୀକୃତି ମିଳିଥିବା ନେଇ ଡା.ମେହେର୍ଦ୍ଦା ତାଙ୍କ ପତ୍ରରେ ସୂଚିତ କରିଥିବା ବେଳେ ଏହି ପଦବୀରେ ନିଯୁକ୍ତି ନିମନ୍ତେ ବେତନ ହାର ଓ ଅନ୍ୟାନ୍ୟ ନିଯୁକ୍ତି ସର୍ତ୍ତାବଳୀ ଓଆରଏସି ରୁଲସ ୨୦୧୭ ଅନୁସାରେ ହେବ।
୧୩ଟି ନୂଆ ପିଏଚସି ସମେତ ୫ ସିଏଚସି, ୭ ଉପଖଣ୍ଡସ୍ତରୀୟ ଚିକିତ୍ସାଳୟର ରିକ୍ତ ଡାକ୍ତର ପଦବୀରେ ଏହି ସବୁ ନିଯୁକ୍ତି ହେବାକୁ ଥିବା ବେଳେ ବଳକା ଡାକ୍ତରଙ୍କୁ ପ୍ରତି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ୫ ଲେଖାଏଁ ଡାକ୍ତର ହିସାବରେ ୩୭୪ଟି ସିଏଚସିରେ ନିଯୁକ୍ତି କରାଯିବ ବୋଲି ଡା.ମେହେର୍ଦ୍ଦା ପତ୍ରରେ ଉଲ୍ଲେଖ କରିଛନ୍ତି। ଏନେଇ ତାଙ୍କ ପତ୍ରର ନକଲ ରାଜ୍ୟର ସମସ୍ତ ଜିଲ୍ଲାପାଳ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଓ ସର୍ବସାଧାରଣ ସ୍ୱାସ୍ଥ୍ୟ ଅଧିକାରୀଙ୍କୁ ପଠାଇ ଦିଆଯାଇଛି। ଏହି ସବୁ ଡାକ୍ତର ପଦବୀ ପୂରଣ ହେଲେ ରାଜ୍ୟ ସ୍ୱାସ୍ଥ୍ୟ ସେବାରେ ଥିବା ଡାକ୍ତରଙ୍କ ଅଭାବ ପୂରଣ ହେବ ବୋଲି ଆଶା କରାଯାଉଛି।
