ପାଟଣାଗଡ ୧।୧୨: ବଲାଙ୍ଗୀର ଜିଲ୍ଲା ବେଲପଡା ଥାନା ଅନ୍ତର୍ଗତ ଧୂମାଭଟା ଗାଁରେ ଥିବା ଏକ ଫଟୋ ଫ୍ରେମିଙ୍ଗ ଦୋକାନରେ ଚଢାଉ । ବଡ଼ ଧରଣର ନିଶା କାରବାର ହେଉଥିବା ଖବର ପାଇ ବେଲପଡା ପୋଲିସ ଚଢ଼ାଉ କରିଥିଲା । ଚଢାଉ ବେଳେ ଘଟଣାସ୍ଥଳରୁ ୫୧ଟି କଫ୍ ସିରପ୍ ସହ ୩୦ଟି ନିଶା ବଟିକା ଜବତ କରିଥିବା ଜଣାପଡ଼ିଛି ।
ଉକ୍ତ ଦୋକାନରେ ଧରଣୀଧର ପ୍ରଧାନ କଫ୍ ସିରପ୍ ବିକୁଥିବା ସମୟରେ ବେଲପଡା ସେକେଣ୍ଡ ଅଫିସର କିରଣ କୁମାର ଯାନୀଙ୍କ ସହ ପୋଲିସ ଫୋର୍ସ ଦୋକାନୀକୁ କାବୁ କରିବାରେ ସଫଳ ହୋଇଥିଲେ । ଅଭିଯୁକ୍ତ ଧରଣୀଧରକୁ ଥାନାକୁ ଆଣି ଅଧିକ ପଚରାଉଚରା କରି ତା ବିରୋଧରେ ଥାନାରେ ଏକ ମୋକଦ୍ଦମା ରୁଜୁ କରି ପାଟଣାଗଡ଼ କୋର୍ଟକୁ ଚାଲାଣ କରାଯାଇଛି ବୋଲି ବେଳପଡା ପୋଲିସ ସୂଚନା ଦେଇଛି ।