ଚଣ୍ଡିଗଡ଼ ୧୧/୦୯: ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବଢ଼ିଚାଲିଥିବା ବେଳେ ମୃତ୍ୟୁସଂଖ୍ୟା ମଧ୍ୟ ବଢ଼ୁଛି । କିନ୍ତୁ ପଞ୍ଜାବର ସ୍ଥିତି ଗମ୍ଭୀର ହେବାରେ ଲାଗିଛି । ପଞ୍ଜାବରେ କରୋନା ଜନିତ ମୃତ୍ୟୁହାର ଦେଶରେ ଅଧିକ । ମହାରାଷ୍ଟ୍ରରେ ଥିବା ମୃତ୍ୟୁହାର ୨.୯୦ ପ୍ରତିଶତକୁ କାଟି ୨.୯୫% ମୃତ୍ୟୁହାର ସହ ଶୀର୍ଷରେ ପଞ୍ଜାବ ।
ପଞ୍ଜାବରେ ଆଜି ସର୍ବାଧିକ ୨,୪୬୪ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୪ ଘଣ୍ଟାରେ ୮୮ ଜଣଙ୍କ ଜୀବନ ନେଇଛି କରୋନା । ବୁଧବାର ମିଳିଥିବା ରିପୋର୍ଟ ଅନୁସାରେ ଅଗଷ୍ଟ ୧ରୁ ୧,୬୭୫ ଜଣଙ୍କ ମୃତ୍ୟୁ ହୋଇସାରିଛି ।
ତେବେ ପଞ୍ଜାବରେ ମୃତ୍ୟୁହାର ଦେଶରେ ସର୍ବାଧିକ ରହିଛି । ଭ୍ୟାକ୍ସିନ୍ ନଆସିବା ପର୍ଯ୍ୟନ୍ତ ନିୟମ ମାନି ଚଳିବାକୁ ପଡ଼ିବ। କିନ୍ତୁ ଅଧିକ କରୋନା ଜନିତ ମୃତ୍ୟୁ ଅନ୍ୟ ରୋଗ ଥିବା କାରଣରୁ ହେଉଛି ବୋଲି ପଞ୍ଜାବ ସ୍ବାସ୍ଥ୍ୟମନ୍ତ୍ରୀ ବଲବୀର ସିଂହ ସିଦ୍ଧୁ କହିଛନ୍ତି ।
ସୂଚନାଯୋଗ୍ୟ ଯେ, ପଞ୍ଜାବରେ ଏବେସୁଦ୍ଧା ମୋଟ ୧୮୦୮୮ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଆଜି ୮୮ ଜଣଙ୍କ ମୃତ୍ୟୁ ସହ ମୋଟ ମୃତ୍ୟୁସଂଖ୍ୟା ୨୧୪୯ରେ ପହଞ୍ଚିଛି ।
