ନୀଳଗିରି,୨୪/୭: ବିଦ୍ୟୁତ ବିଭାଗର ଅପାରଗ ଅଧିକାରୀଙ୍କ ପାଇଁ ପୁଣି ଜଣେ ଅସ୍ଥାୟୀ କର୍ମଚାରୀଙ୍କ ମୃତ୍ୟୁ ଘଟିଛି । ସୂଚନାଯୋଗ୍ୟ ନୀଳଗିରି ଥାନା ଅଧିନ ଜାମୁଡିହା ପଂଚାୟତ ବଡ଼ବିଲ ଗ୍ରାମରେ ଏକ ଫାର୍ମ ହାଉସକୁ ସଜାଡ଼ିବାକୁ ଅସ୍ଥାୟୀ କର୍ମଚାରୀ ଭାଗିରଥି ମାଝୀ ନାମକ ବ୍ୟକ୍ତି ଲାଇନମ୍ୟାନ ଶଙ୍କର ମଲ୍ଲିକଙ୍କ ସହ ଯାଇଥିଲେ। ବିଦ୍ୟୁତ କାଟ ପରେ କାମ କରି ସଜାଡୁଥିଲେ । ହେଲେ ଭାଗିରଥୀ ସେହିଠାରେ ବିଦ୍ୟୁତ ସଂସ୍ପର୍ଶରେ ଲାଗି ଟଳିପଡିଥିଲେ । ତାଙ୍କୁ ତୁରନ୍ତ ହସ୍ପିଟାଲକୁ ନଆଣି ୧୦୮ ଆମ୍ବୁଲାନ୍ସ ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ ପଡିଥିଲା ।
ନୀଳଗିରି ହସ୍ପିଟାଲକୁ ଆଣିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତକ ହେଉଛନ୍ତି ପୁର୍ବତନ ବିଦ୍ୟୁତ କର୍ମଚାରୀ କାଲୁ ମାଝୀଙ୍କ ପୁଅ । ତାଙ୍କର ଘର ରେମୁଣା ଥାନା ଅଧିନ ଅଯୋଧ୍ୟା ନଗରପାଟଣା । ସେ ସଜନାଗଡ଼ ବିଦ୍ୟୁତ ଷ୍ଟ୍ରକଚରରେ ଅସ୍ଥାୟୀ କର୍ମଚାରୀ ଭାବେ କାର୍ଯ୍ୟ କରନ୍ତି। ପ୍ରଶ୍ନ ଉଠୁଛି ଲାଇନମ୍ୟାନ ଜଣକ ନିଜେ କାମ ନକରି ତାଙ୍କୁ କାର୍ଯ୍ୟରେ କଣ ପାଇଁ କାମରେ ଲଗାଇଥିଲେ । ଆଜି ତାଙ୍କର ଜୀବନ ଗଲାପରେ ସରକାରୀ କ୍ଷତିପୂରଣ ମିଳିବା ମଧ୍ୟ କଷ୍ଟକର ବ୍ୟାପାର ହେବ ।
କିଛି ମାସ ପୂର୍ବରୁ ସଜନାଗଡ଼ ଷ୍ଟ୍ରକଚର ଅଧୀନ ନରଣପୁର ଅଞ୍ଚଳର ଜଣେ ଅସ୍ଥାୟୀ କର୍ମଚାରୀଙ୍କର ମୃତ୍ୟୁ ପରେ ବହୁ ତୁମ୍ବିତୋଫାନ ଉଠିଥିଲା । କ୍ଷତିପୂରଣ ବାବଦରେ କାର୍ଯ୍ୟରତ ଲାଇନମ୍ୟାନ କିଛି ଟଙ୍କା ଦେଇ ଖସିଯାଇ ନିଜର ଚାକିରୀ ସୁରକ୍ଷିତ ରଖିବାକୁ ସକ୍ଷମ ହୋଇଥିଲେ । ଏପରିକି ବିଭାଗୀୟ ଏସଡିଓ ଏବଂ ଜେଇଙ୍କ ନାମରେ ମଧ୍ୟ ଥାନାରେ ଅଭିଯୋଗ ହୋଇଥିଲା । ବହୁ କଷ୍ଟରେ ମଧ୍ୟ ସେମାନେ ଘଟଣାଙ୍କୁ ସମାଧାନ କରି ଖସି ଯାଇଥିଲେ । ଆଜି ମଧ୍ୟ ଏଭଳି ଘଟଣାର ପୁନରାବୃତ୍ତି ହୋଇଥିବା ବେଳେ ପୁଣି ଅଧିକାରୀଙ୍କ ଅପାରଗତା ପଦାରେ ପଡିଛି। ତେବେ ଏଭଳି ଜଣେ ଅସ୍ଥାୟୀ କର୍ମଚାରୀଙ୍କ ମୃତ୍ୟୁକୁ ନେଇ ଅଂଚଳରେ ଉତ୍ତେଜନା ପ୍ରକାଶ ପାଇଛି।
