ନୂଆଦିଲ୍ଲୀ ୨୧/୦୭ : ଦେଶରେ କରୋନା ସଂକ୍ରମଣକୁ ନେଇ ପୁଣି ଥରେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧି । ରାହୁଲ ଗାନ୍ଧୀ ଅଭିଯୋଗ କରିଛନ୍ତି ଯେ, ଦେଶରେ କରୋନାର ଦ୍ବିତୀୟ ଲହର ସମୟରେ ଭାରତ ସରକାରଙ୍କ ଭୁଲ ନିଷ୍ପତ୍ତି ଯୋଗୁଁ ଦେଶରେ ମୃତ୍ୟୁ ସଂଖ୍ୟା ଅହେତୁକ ବଢିଲା । ଏଥି ପାଇଁ କେନ୍ଦ୍ର ସରକାର ହିଁ ଦାୟୀ ବୋଲି କହିଛନ୍ତି ରାହୁଲ ଗାନ୍ଧୀ ।
କେନ୍ଦ୍ରର ମୋଦି ସରକାରଙ୍କୁ ଟାର୍ଗେଟ୍ କରି ରାହୁଲ ଗାନ୍ଧୀ ଟ୍ବିଟ୍ କରି କହିଛନ୍ତି, ‘କୋଭିଡ୍ର ଦ୍ବିତୀୟ ଲହର ସମୟରେ ଭାରତ ସରକାରଙ୍କ ଭୁଲ ନିଷ୍ପତ୍ତି ଯୋଗୁଁ ୫୦ ଲକ୍ଷ ଲୋକଙ୍କ ମୃତ୍ୟୁ ଘଟିଛି । କେନ୍ଦ୍ର ସରକାରଙ୍କ ମନମୂଖୀ ନିଷ୍ପତ୍ତି ପାଇଁ ଦେଶର ଅନେକ ଭାଇ, ଭାଉଣୀ, ମାଆ-ବାପାଙ୍କ ଜୀବନ ଯାଇଛି।’
{"width":827,"height":275}
ସୂଚନାଯୋଗ୍ୟ ଯେ, ଦେଶରେ କରୋନା ମହାମାରୀ ଏବଂ ଏହା ସହିତ ଜଡିତ ନିଷ୍ପତ୍ତିକୁ ନେଇ କେନ୍ଦ୍ର ସରକାରଙ୍କୁ ଲଗାତାର ଭାବେ କାଠକଡାରେ ଛିଡା କରୁଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଆଉ ଏକ ଟ୍ବିଟ୍ରେ ରାହୁଲ ଗାନ୍ଧି କହିଛନ୍ତି, ଆପଣାଙ୍କୁ ହରାଇଥିବା ଲୋକମାନଙ୍କ ଲୁହରେ ସବୁ ରେକର୍ଡ ହୋଇ ରହୁଛି । ଏହା ପୂର୍ବରୁ ସେ କହିଥିଲେ, ସମ୍ବେଦନଶୀଳତା ଏବଂ ସତ୍ୟ ପ୍ରକାଶ କରିବାର ସତସାହସ ନଦେଖାଇବା ପୂର୍ବରୁ ଥିଲା ଏବଂ ବର୍ତ୍ତମାନ ମଧ୍ୟ ରହିଛି ।
ଏହା ପୂର୍ବରୁ ସଂସଦର ମୌସୁମୀ ଅଧିବେଶନରେ, କୋଭିଡ୍ ମୃତ୍ୟୁ ରିପୋର୍ଟ ଲୁଚାଇଥିବା ନେଇ ସରକାରଙ୍କୁ ସିଧାସଳଖ ଭାବେ ଟାର୍ଗେଟ କରିଥିଲେ ବିରୋଧୀ । ଏହାର ଜବାବ ଦେବାକୁ ଯାଇ ବିରୋଧୀଙ୍କ ତଥ୍ୟ ଭିତ୍ତିହୀନ ତଥା ତଥ୍ୟ ଭିତ୍ତିକ ନୁହେଁ ବୋଲି କହିଥିଲେ ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବୀୟ । ସ୍ବାସ୍ଥ୍ୟମନ୍ତ୍ରୀ କହିଥିଲେ, ଯେଉଁ ରାଜ୍ୟମାନଙ୍କରେ କରୋନା ବିରୁଦ୍ଧରେ ଭଲ କାମ ହୋଇଛି ସେମାନଙ୍କୁ ଉଚ୍ଚ ପ୍ରଶଂସା କରାଯାଇଛି ଏବଂ ସେଠାରେ ଦେଖାଯାଇନାହିଁ ଯେ, କେଉଁ ଦଳର ସରକାର ରହିଛି ।
